Shillong, Nailar 28
Ka Nationalist Congress Party (NCP) ha ka 25 tarik Nailar, 2025, kala pynbna ba ka la thung ïa u Bah Dapkupar Nongrum kum u Secretary ka Meghalaya State NCP naduh katei ka sngi.
Katkum ka kyrwoh ba la phah sha ki lad pathai khubor da u OK Sangma, uba dei u MLA barim bad uba dei mynta u State President ka Meghalaya State Unit, NCP, ka seng kala ong namarba u Bah Dapkupar Nongrum u dei na ka thaiñ Rilum Khasi, kumta la bthah ïa u ban long u nongai jingmut ïa ki briew kiba na ri lum Khasi bad Jaiñtia ban bat ïa ka kam kum ki nongkitkam bad dkhot jong ka seng bad ba ïa ki kyrteng jong ki yn pynrung ha ka thup ba pura jong ki bor treikam jong ka Meghalaya State NCP Unit.
Ka seng kala phah ruh ka jingkitbok kitrwiang ha ryngkat ka jingkyrkhu kyrdoh ïa u Bah Dapkupar Nongrum ha ka kam thymmai jong u.
