Ka pisa ka pynpisa, ong ka ktien, namar ka lak ka putit kan ym lah ban thied lut ïa kiei-kiei ha kane ka sla pyrthei. Ka pisa ka lah ban thied ïa ka jingthiah tangba kam lah ban ai ïa ka jingïoh thiah ka basuk kynjai. Ka pisa ka lah ban ïalam sha ki jaka sumar ba remdor tangba ka lah ban ym wanrah ïa ka jingkoit jingkhiah kaba biang nadong shadong. Ka pisa ka lah ban thied ïa ka longrynïeng ki briew watla kam lah ban thied ïa ka jingieid. Ka pisa ka lah ban thied ïa ki kot ba remdor watla ka lah ban ym wanrah jingshai bad ka jingnang ka jingtip. Ka pisa ka lah ban thied ïa ka ‘vote’ watla ka lah ban pyndkoh lut ïa ka jingsynshar ka khadar bad ka bishar. Bad shisien ba la bakla ha ka synshar ka khadar ka bishar, la bakla lut na khlieh sha tbian.
Hynrei ka ktien ruh ka ong ba ka pisa ka kren briew. Ki briew kim donkam ban ïakren ïakhana, hynrei tang shu pynkham ha ki sla kti, ka kam ka jam ka la ïaid shakhmat. Ha kiba kum kine ki por, ka jingpynkham ka shyrkhei na ka jingïohsngew sharum shaneng bad ka jingpeit sha kadiang kamon. Tang kiba pynkham bad kiba shah pynkham kin sngewthuh. Ngim tip naei kata ka lak ka putit ka wan, hynrei kiba ïoh ki la nang ïoh na kadiang na kamon. Don kiba sngew ba kam pher ban shim ïa ka pisa ïoh ei namar la shu wan ai hi khlem da pan. Ka pisa ka bym don jingkheiñ bad kaba lait shabar jong ka ruh khajna lane kata ka ‘Black/Unaccounted Money’ kiba ki ong ha ka ktien nongwei. Ka jingbun ka pisa ka long kaba ishyrkhei. Ka jingïakren kam dei shuh tang da ki klur, hynrei da ki phew bad spah klur. Mynshwa, ki ïakren da ki spah, hajar, phew hajar, lak bad phew lak. Ka pyrthei mynta ka la kren da kawei ka sur – ka sur jong ka klur.
Haba ka pisa ka pynpisa, hynrei ka kren briew watla kam lah ban thied lut ïa kiei-kiei, ngin ïa ong ka dei kaba bha ne ka basniew? Tang kiba don ne kiba ai bad kiba shim kin sngewthuh. Ka jingpynkham ka pynsyaid hur ïa ki sla kti bad ki pla watla kam lah ban ai ïa kata ka jingsyaid kaba shi lynter jingim. Ngin dang hap ban ïakhih ïaksar na ka bynta ka ja ki jhur bad kiwei ki jingdonkam hadien ba kato ka jingshah pynkham ka lut noh. Ym ju don satia kano-kano ka mar kaba neh shi junom. Ka pisa ka wan bad ka leit. Ka pisa ïoh ei lei ka shu wan hak dak bad ka leit ruh hak dak. Ha kano ka rukom ka lut, ym lah ban sngewthuh. Wat ka pisa kaba la kamai da ka umsyep ruh ka dang lut bad kadiang bad kamon, sa ka pisa ïoh ei lei kan eh aïu ban jah rngai tang shi khyllipmat? Ka ïoh ei ka pynkmen tang shipor bad kam lah ban ai jingsuk baroh shirta.
La ju ïoh sngew ba haba donkam ban pyndep ïa kino kino ki kam khamtam lei haba donkam kyrkieh, dei tang lyngba ka jingpynkhamti ba lah ban pyndep ïa ki kam. Shano shuh kata ka jingkhuid jingsuba haba trei ïa ki kam ki jam. Lada ym lah ban ai kata kaba ju ïa ong ka ‘Bai Sha’ ka mut ki kam ki shu sahkut beit. Kane ka ïaid kat shaba phai. Ngi donkam ban ïaleh ban kiar na kane, naba uba don te u biang beit bad ka kam ruh ka ïaid wut wut, kaei pat ka ban jia ïa ki bym don, hato ki kam jong ki, kin shu sahteng noh.
