Minnesota, Nailar:
U Lat jong ka Minnesota, u la pyntip ba ka la mih ka jingiather kuli ba shyrkhei hapoh ka skul Minneapolis Catholic School jong ka Minnesota ha ka step Sngi Balang.
La ong ba uwei u briew, u la leit synreit kuli naphang ia katei ka skul Katholik ha Minneapolis ha ka Sngi Balang, ha kaba ar ngut ki khynnah skul ki la duh ei ia ka jingim bad 17ngut kiwei pat ki la mynsaw, hashwa ba un shim noh syndon ia la ka jong ka jingim. Kitei ki khynnah ba khlad, ki dei kiba dang ha ka rta 8 snem bad 10 snem.
Utei u nongsiat, um dei uba la bud-nam ne don dak sniew teng ha kiwei ki kam sniew, hynrei la ithuh ia u, kum u Robin Westman, uba dang ha ka rta kumba 20 snem eiei.
La ong ba kitei ki khynnah skul ki dang iashim bynta ha ka jingduwai ‘mass’ ha katei ka step, ha ka por ba la leit synreit kuli da utei u runar. Katba ki pulit, ka FBI bad kiwei kiwei ki nongtrei jong ka sorkar bad ki kali kit nongpang ki dang ïalum lang ha katei ka skul, la iathuh ba la phah mih noh ia baroh ki khynnah skul namar jong katei ka jingjia.
Kane ka jingsynreit kuli, ka la jia tang hadien 2 sngi ba la sdang skul ha Annunciation Catholic school kaba dei ka skul rit jong ki riew shimet kaba don kumba 395 ngut ki khynnah skul. Kane ka skul ka ïasoh bad ka Balang Katholik Annunciation bad kine ki don ha ka shnong ba la kham heh paid sha ka phang Shatei Lam Mihngi jong ka nongbah Minnesota.
U President ka US, u Donald Trump, u la kular ha ka jingkren jong u, ha ka Truth Social, ba ka White House kan dang ïai buddien ia katei ka jingjia bad ka jinglong- jingman ha katei ka skul, ban pyntikna ia ka jingshngaiñ jong ki khynnah bad ki nonghikai bad ia baroh hi ki dkhot treikam jong katei ka skul.
Naduh ka snem 1923, katei ka skul, ka ju buh ia ka por pynlong jingduwai ‘mass’ naduh ki klas rit haduh ka klas kaba phra ha ka por 8:15 mynstep.
