Shillong, Nailar 28
Ka Meghalaya Chess Association (M.C.A) ka la pynpaw ïa ka jingsarong halor ka jingïoh khusnam ki shi kpa shi khun kiba na ri lum Garo ha ka “1st Andaman & Nicobar International Open FIDE Rated Chess Tournament 2025” kaba la long ha Port Blair naduh 23 haduh 28 tarik mynta u bnai.
Kine ki long u Silseng N.Marak uba la wan ba nyngkong ha ka ‘Below – 1700’ bad ka Cheaha Nikgame G. Momin kaba la wan ba nyngkong na kiba hapoh 13 snem rta.
Shuh shuh ka MCA ka la pynbna ruh halor ka jinglah ban ïalehkai bha ki nongïalehkai kiba na ri lum Garo na ka bynta ban ïohpdiang ïa ki khusnam ha ka “2nd Guwahati Smart City International Open FIDE Rating Chess Tournament 2025” kaba la long ha Guwahati naduh 4 haduh 8 tarik mynta u snem.
Kine ki long ka Nikman G. Momin, kaba la wan ba-ar napdeng kiba hapoh 14 snem rta bad u Silkam A Sangma uba la wan ha ka kyrdan ba san ha ka ‘Below-1850’.
Te kumta kat kum ka jingpyllait khubor da u Publicity Secretary ka MCA u Bah K. Pajat la ong ba na ka liang ka synjuk ka la ai khublei kitbok ïa kitei ki nongïalehkai ba kin nangjam shaphrang ha ki kam ïalehkai jong ki.
