Shillong, Nailar 28
U Myntri ba khmih ïa ka kam jngohkai pyrthei u Bah Paul Lyngdoh ha ka sngi Palei u la maham halor ka jingkynthoh kaba lah ban mih na ka jingpynjari ïa ki lad ki lynti ban khanglad ïa ka jingwan rung ki nongjngohkai (tourist) ba nabar da kaba kdew ba ki jylla ba marjan ki lah ban siew kylliang da kaba pynjari ïa ki kyndon kiba kum kine ïa ki nongjngohkai pyrthei na ka jylla Meghalaya, kaba lah ban don ka jingktah kaba sniew ïa ka Jylla Meghalaya.
U la ong ba lada pynjari ïa ki kyndon ba pyrkhing ïa ka jingwan rung ki kali tourist ba nabar kan shah ktah kylla ïa ka Jylla Meghalaya.
Kane ka jingkren jong u ka long kum ka jingkynthoh halor ka jingïakhih kaba dang shen kaba la pynlong da ka All Khasi Meghalaya Tourist Taxi Association (AKMTTA) kaba la dawa na ka Sorkar Jylla ban pyrkhing ïa ki kali tourist kiba wan na shabar ba kin leit kamai sha ki jaka jngohkai pyrthei.
“Hynrei ngi hap ruh ban peit kiei ki jingma kiba lah ban mih na ka jingpynphai markylliang. Kaei ka ban jia lada ki jylla ba marjan ruh ki pynjari lang da ki kyndon ïa ka jingrung jong ki kali tourist na Meghalaya sha Assam. Mano ban kit ïa ka jingkitkhlieh ha kata ka por bad mano ban shim ïa ka jingkitkhlieh? Hato ki ‘Taxi Association’ kin shim ïa ka jingkitkhlieh lada ki nong Meghalaya kin leit sha Airport ne Railway Station lane leit shah sumar ha Guwahati? Ngi kum ka sorkar ngi hap ban leh da ka jingkitkhlieh kaba khraw,” la ong u Bah Paul ha ki nongthoh khubor haba kyntu ïa ki ‘Taxi Association’ ba kin bteng ban ïakren bad ka komiti ba la khlieh da u bah Cyril Diengdoh bad ban poi sha ka jingïasngewthuh jingmut.
U la ong ba katei ka komiti kaba la thaw da u Myntri Rangbah ka jylla, ka la dep ban ïakren la bunsien bad ki nongshim bynta, kynthup ïa ki ‘Taxi Association’, ban wad ïa ka lad ban weng ïa ka jingeh.
Da kaba ñiew ïa kane ka mat kum ka mat kaba jyrwit jyrwat bha, u Bah Paul u la pynthikna ba ka sorkar ka shimkhia ban pynthikna ba ka kam jngohkai pyrthei kan ai jingmyntoi ïa ki jing ïohkam ïohjam ki trai shnong.
U Myntri u la pyntip ba ka sorkar ka pyntreikam ïa ka PRIME Vehicle Scheme, kaba ai pisa 80% ïa ki nongpynïaid ïa ki kam jngohkai pyrthei ban thied ïa ki kali kiba rem. Kane ka skhim ka thmu ban kyntiew ïa ka kam khaïi ha ka thaiñ bad ban ïoh jingmyntoi na ka kam jngohkai pyrthei ba kan nangkiew.
U Bah Lyngdoh u la pynbna ba shen yn sa pyllait biang ïa ka ‘portal’ na ka bynta katei ka skhim, ha kaba yn sa pynkiew sa 100 tylli ki kali PRIME.
“Nga dang shu don jingïalang bad u Commissioner & Secretary ba khmih ïa ka tnat jngohkai bad tang khyndiat sngi naduh mynta ka sngi ngin sa plie biang ïa ka ‘portal’ jong ka tnad jngohkai pyrthei bad ha kane ka kynti ngi dang peit ïa ka jingkiew sa kumba 100 tylli ki kali PRIME” u la ong.
U la ong ruh ba mynta phim lah ban khmih lynti ba kine ki briew kin hiar shano shano bad nangta kin shim wai sa kawei pat ka kali. “Hynrei kaei kaba ngi ong ka long ba ngin pynthikna lypa ba kin shah rah sha ki jaka sah jong ki la ka long ha ki ïingsah ne ki hotel hadien kata ki lah ban pyndonkam da ki kali trai shnong, ïa kata ka rukom treikam la pyntreikam lyngba kane ka komiti ba la khlieh da u bah Cyril Diengdoh” u la bynrap.
Haba kylli, u Myntri u la ong, “Ka dei ka bynta kaba nang kiew. Ha kine ki snem baroh, phim ju ïohsngew ïa ka jingdawa kaba jur bad kum kine ki mat ba la pynpaw da ki ‘Taxi Association’ balei, namar ba ka kam jngohkai pyrthei kam shym la jia, ka kam jngohkai pyrthei ka la long kaba duna bha. Mynta ryngkat bad ka kam jngohkai pyrthei kaba la nang kiew, kumba ka paw ki briew ki nang bun kiba kwah ban ïoh ïa ki jingmyntoi na kata ka bynta.”
Ha kawei pat ka jingkylli, u Bah Paul u la pynpaw ïa ka jingsngewkhia da kaba ong, “ngim khmih lynti ba ki seng treimon sngewbha kin leh kum ki nongleh kam sniew. Ka jinglute ïa ki nongleit nongwan ka lah ban ai jingmyntoi ïa u briew u ba kamai 1000 tyngka ne tam hynrei ha kaba khatduh u don ïa ka longïing, u don ki paralok kiba shaniah na ki kam jngohkai pyrthei.”
“Kane ka dei ka mat kaba ngi shim khia bha. Ngan sa rah bad ïakren ïa kane mar syn wan phai u Symbud Myntri Rangbah ka Jylla ba khmih ïa ki kam pohïing” la kular u Bah Paul.
