Shillong, Nailar 28
U Nongïalam ka United Democratic Party (UDP) u Bah Paul Lyngdoh uba long ruh u Myntri Sorkar ha ka sngi Palei u la ong ba ka jingtyrwa ba dang shen jong ka Sorkar ban siew tulop ïa ki nongtrei ki District Council, ka dei ka jingthmu ban ïarap pisa ban wanrah jingkylla, bad ruh ban khanglad ïa ka jingtyrkhong ka pla tyngka jong ki Autonomous District Council (ADC) ha Meghalaya.
Katkum ka jingong jong u, ka jingtyrwa ka Sorkar kam dei ka blank cheque (ka cheque bym kdew ïa katno ka pisa) hynrei ka jingkyrshan da ka kyndon ba donkam ba ki ADC kin wanrah ïa ka jingpynkylla ha ka rukom treikam.
Ka Sorkar Jylla kala thaw ïa lai tylli ki sub-committee ban ïakren bad ka GHADC, KHADC bad JHADC halor ki jingtyrwa ban wanrah ïa ki jingpynkylla ha ka jingpynïaid ïa ka pla tyngka ba kynthup ïa ka jingsiew ïa ka tulop sha la ki jong ki nongtrei bad ban aiti ïa ka kaiphod hapoh ka 45 sngi.
“Ka long kaba kongsan ban pynïapher hapdeng ka jingai pisa mon sngewbha bad kaei kaei kaba dei ban leh. Ha kane ka kam, kaei kaba ka Sorkar ka tyrwa ka dei ka plan ïarap pisa ban wanrah jingkylla namar artylli na ki ADC kila hap ïaksaid ha ka pisa tyngka. Lada ki dang bteng ha kane ka rukom treikam ba mynta bad ka jingpynmih pisa nalor ka jingbun palat ki nongtrei, kin sa khyllem tang hapoh lai ne saw snem. Namar kata, shuwa ba kan poi ha une u khep, kane ka dei ka jingtyrwa ba kin wanrah ïa ka jingkylla ha ka rukom treikam. Na ka bynta kane ka jingkylla, ngi la ai ka jingkyrshan ïa ki katne ha ka liang ka pisa tyngka,” ong u Bah Paul haba kren sha ki lad pathai khubor.
U Bah Paul u la ong ba ka Sorkar kala tyrwa ban kyrshan pisa ïa ki ADC bad ma ki pat kin hap ban pynbeit ïa ka jingdon ki nongtrei, ban pynkhlaiñ ïa ka jingpynmih pisa, bad pyntreikam ïa kiwei pat ki jingpynkylla kiba donkam.
U la pyntip ruh ba katto katne ki ADC ki dei kiba don bun palat ki nongtrei, bad kawei lei ka don ïa ki nongtrei ba palat 1500 ngut.
U la ban jur ba ka jingkyrshan jong ka Sorkar ka dei kaba don bad ka kyndon ïa ki ADC ba kin shim ïa ka sienjam kaba dei ha ka ban wanrah ïa ka jingpynkylla ha ka rukom treikam bad ka jingpynmih pisa.
“Nga ïai ban ba ka dei ka sienjam kaba biang eh kaba la leh da ka Sorkar Jylla namar kumba phi ïatip ba baroh ki ADC ki ju shaniah ïa ka jingkyrshan ba ka Sorkar Jylla ka ai ha ki kum ka jingsam ïa ka bhah khajna na ki marpoh khyndew bad kiwei kiwei. Ngi donkam markylliang bad ha kane ka kam, haba ngi ïohi ba ki ADC ki jan poi sha u pud ban khyllem, ngi kwah ban tyrwa sha ki ïa ka jingim bad kane ka dei ka jingim ba ka Sorkar ka tyrwa,” ong u Bah Paul.
U Myntri u la pynpaw ruh ba ka jingthmu jong ka Sorkar ka dei eh halor ka jingpynbeit ïa ka jingthung nongtrei bad ban pynthikna ba ki ADC kin don ïa ka pla tyngka kaba biang.
Katkum ka jingong jong u, ka Sorkar kam lah ban shu shong kli kti bad shu peit ba ki ADC kin khyllem, bad kane ka plan ban ïarap bei pisa ka dei ka sienjam ba donkam ban khanglad ïa kum kane ka jingmih.
