Jowai, Nailar 28
U Superintendent of Police ka East Jaiñtia Hills, u la pyntip ba ha ka 17 tarik Nailar ki la ïoh jingtip lyngba u Waheh Shnong ka Khliehriat East, halor ka jinglap jong ki nongshong shnong ïa kawei ka metïap ba la pyut kaba per ha kawei na ki thliew ba la shu iehnoh hajan Indian Petrol Pump, Khliehriat East.
Hadien kane, ki pulit hapoh ka jingïalam jong u SI ASR Lakiang ki la wan poi sha kane ka jaka ban pynlong ïa ka jingtohkit, bad hadien la sei noh ïa kane ka metïap na katei ka thliew bad la pyndep ïa baroh ki jingdonkam ha ka jingïadon lang ki nongsakhi.
Ïa kane ka metïap la pynkynriah noh shapoh Khliehriat Civil Hospital na ka bynta ban leh ïa ka post mortem khnang ban lap ïa ka daw jong ka jingïap.
Haba tohkit bniah na ki nongshong shnong ym shym la don kiba lah ban ithuh ne ban don jingtip eiei ha kaba ïadei bad kane ka metïap.
