Shillong, Nailar 28
Ki nongkitkam kiba hakhmat jong ka Meg-halaya Pradesh Congress Committee ki la pyn-khreh ban leit sha ïingbishar kaba hakhlieh duh ka ri ka Supreme Court lada u Lamphang um pdiang ïa ka jingujor ban mait kyrteng ïa ki saw ngut ki MLA kiba la phet ban leit pynïasoh sha ka NPP.
Haba ïakren bad u Bah Manuel Badwar uba dei u Secretary ka MPCC u la ïathuh ba ha ka sngi Palei ryngkat bad u Bah Kynpham Khar-lyngdoh uba dei u Chairman ka Legal Cell u la pyntip ba sa shisien ka Congress ka la ujor sha u Lamphang ka ïingdorbar thawaiñ ka Jylla ba dei ban mait kyrteng noh ïa baroh saw ngut ki MLA Congress kiba la phet ban leit pynïasoh sha ka NPP.
U la ong ba ka Congress ka kwah ba ka jingbishar kan ïaid katkum ki riti synshar la ka long ban mait kyrteng ne ban ym mait kyrteng ïa ki 4 ngut ki MLA ka Congress kiba la phet noh na ka seng.
Kine ki saw ngut ki MLA kiba la phet na ka seng ki kynthup ïa u Bah Charles Marngar MLA Mawhati, Dr. Celestine Lyngdoh MLA Umsning, Bah Gabriel Wahlang MLA Nongstoiñ bad u Bah Ronnie V Lyngdoh MLA ka Mylliem Konstitwensi.
U la ïathuh ba ïa ka mukotduma ba nyngkong la ujor da u Bah Ronnie ha ka por ba ki 3 ngut ki la phet na ka seng bad rung sha ka NPP hynrei mynta hadien ba u Bah Ronnie u la leit ban rung sa ïalade sha ka NPP, la shimti noh da ma u kaba mut u Bah Manuel Badwar.
Shuh shuh u la pyntip ba ïa kane ka jingujor ka dei kaba la phah na ka AICC naduh Delhi.
U la ong ruh ba ka saiñpyrthei ha Meghalaya kam khuid shuh namar wat u Lamphang ruh u la noh tarajur, um long laitluid shuh kum mynshwa.
U Bah Kynpham u la ong ba lada u Lamphang u kyntait ïa kane ka jingujor, ka Congress kan leit sha ïingbishar High Court bad lada shah kyntait ha High Court kan leit sa sha Supreme Court haduh ban da ïoh ïa ka jingbishar kaba hok.
