Jowai, Nailar 28
Ka NPP Primary Unit Mission Compound, Jowai ka la sdang ïa ka lympung ïalehkai ba la tip kum ka 6-Aside Football Tournament ha ka sngi Palei ha madan Biar Skur, Jowai.
Ïa kane ka lympung la wan ban plie da u Working President ka NPP West Jaiñtia Hills District u Bah Nidamon Chullet kum u kongsan ha ka jingdonlang u Waheh Shnong barim ka Tympang Ïawmusiang Jowai kum u symbud kongsan, u Waheh Shnong ka Lion Mission Compound u Bah DH. Synrem nalor kiwei pat.
Haba pynïaid ïa ka jingïalang u Chairman Bah Donkupar Synkrem ula pyntip ba la don 26 tylli ki kynhun ïalehkai kiba la ïashim bynta bad ka jingthmu ka long ban pynshlur bad ban kyntiew ïa ki khun samla kiba don ïa ka sap ïalehkai phutbol.
U Bah Nidamon Chullet ha ka jingkren ha katei ka sngi ula ïaroh ïa ki nongïalam ka NPP Primary Unit Mission Compound, Jowai halor ka jinglah ban pynlong ïa kaba kum kane ka lympung ïalehkai kaba long ka jingmyntoi ïa ki khun samla kiba don ka sap ïalehkai.
Haba pynpaw halor ka jingkongsan jong ka jingïalehkai sports, u Bah Chullet ula ong ba ym tang ba ka long ka bynta jong ka koit ka khiah bad ka lad ïoh kam ïoh jam, hynrei ba ka long ruh kum kawei ka shlem hikai ba ki samla kin lait na ki jingdih ba sniew.
U Bah Chullet ula kyntu ruh ïa ki samla ban trei shitom namar ka jingïalehkai phutbol ha kine ki sngi ka dei ka karkhana kaba lah ban ai kam aijam ïa ki samla ba kin ïeng ha la ki kjat.
Ïa ka jingïalang la pynwai da ki kyntien khublei na u President NPP Primary Unit Mission Compound, Jowai u Bah Heipormi Dhar.
Haba phai sha ka jingïalehkai ha kane ka sngi sdang, ka Mynthong-B ka la jop kput haduh 9-1 kol pyrshah ïa ka Loomkyrwiang.
