Shillong, Nailar 28
Ka ïingbishar Special Judge (POCSO) ka Ri-Bhoi District, kala hukum ban set phatok haduh 10 snem ïa ki lai ngut ki runar kiba thmu ban batbor jubor ïa lai ngut ki khynnah.
Kine ki lai ngut ki kyrteng u Mawri Ksing, Sbishon Songthiang bad u Bron Prang, kiba la shah pynngat kam bymman hapoh ka kyndon 448/376D/511/354A IPC pule lang bad ka kyndon 9(g)/10 POCSO Act.
Katkum ka jingpyntip u Superintendent of Police ka Ri-Bhoi, u VS Rathore, kane ka case ka dei kaba la register ha thanad Nongpoh katkum ka Case No 147(06)2017 u/s 448/376D/511/354A IPC pule lang bad ka kyndon 9(g)/10 POCSO Act bad ïa ka jingtohkit la pynkhamti ha ka WP/UBSI ka kong E. Khardewsaw.
La ïathuh ba dei ha ka 29 tarik Jylliew 2017, ki Pulit ka Nongpoh kila ïoh jingtip ba ha ka 28 tarik Jylliew, ki laingut ki runar hadien ba kila ïadih kyaid bad buaid, kila leit rung ha kawei ka ïing bad kila jrong kti khlem akor ïa ki laingut ki khynnah da ka jingthmu ban ïabatbor ïa ki.
Hadien ka jingbishar kaba bniah katkum ka charge-sheet bala aiti ha ka 23 tarik Risaw, 2017, ka ïingbishar kala ai ïa ka hukum ban set phatok ïa kine ki runar haduh 10 snem lem bad ka kuna ba T.20,000 namar ka jingpyrshang ban ïabatbor jubor ïa kine ki khynnah, kaba hap hapoh ka kyndon 376D/511 IPC.
Ka ïingbishar kala hukum ruh ban set phatok sa 6 bnai namar ka jingleit rung jubor ha ka ïing kaba ïaid katkum ka kyndon 448 IPC bad ka hukum ban set phatok 2 snem bad ka kuna ba T.1000 namar ka jingjrong kti khlem akor katkum ka kyndon 354 A IPC.
Nalor kine, ka ïingbishar kala hukum ruh ban set phatok 6 snem bad ka kuna ba T.10,000 ïa kine ki lai ngut namar ka jingleh khlem akor ba palat pud.
