Raphael Warjri
Haba don kiba pang ba jhia ha ïing ha sem, khamtam haba ki la pang jur bad haba la dei ha ka ryta ba lah tymmen, kaba beit ka lynti ka long ban don ryngkat marsyndah bad ki nongpang ba kin ïoh mynsiem ban sngew shngaiñ bad ban ai jingsumar da kiba synlar ba ym dei shuh ban pynkhia ha ka rukom sumar lane ha kaba pynlut ksan. Kane ka long kyllum ïa ka imlang sahlang, khamtam ïa kiba duk ba raitoi, hynrei kiba riewspah la shem ba bunsien kim pyrwa ban pynlut la ka spah ka hajar bad kim pyrwa ban don ryngkat ha syndah jong ki nongpang, namar ka kamai spah ka kham kor ba kin siew da ka dor ïa ki nongsumar khlem thehsei la ka jingieit bashisha da ka mynsiem basbun ba pyntngen. Kane ka long shiban haba pang tang marwei, ïa khluh ban sumar da ki bahaïing bahasem katba lah la ka bor ka sor, nangta ban aiti sa ha ki nongsumar kiba jyllei katkum ka jingtbit ha la ka kam sumar sukher, bad kaba shlei ki dawai dashin bad ki lad sumar lyngba ki kor ki bor tang na ka bynta iwei I nongpang.
Lada kheiñ lang ïa kita kiba seibor ban kyrmen ban ai jingkoit jingkhiah ïa iwei I nongpang ka long kaba ym lah ban shongñia ha ka pyrkhat briew ba shisha, hynrei ym lah ban kun ka dohnud jong ki bahaïing bahasem ban kiar na ka ba ïai pyrshang. Kumjuh ruh ki doktor ki nos kum ki riewtbit ki pyrshang katlah katiai ban pynkhiah da la ka jingtbit, bad ki dawai dashin ryngkat ki kor ki bor sumar ki synrop ban ai jingsumar da kaba kyrmen bad ïai kyrmen. Jar la katta, haba shim kyllum, kita ki jingpyrshang ki long lehnohei ba ka jinglong jingman barabor ka long tang ban pynjlan ïa ka jingim shipor kaba ym ju palat ïa ka shisnem. Lada pynshongñia, ha kita ki shibnai arbnai ne haduh shisnem ba sumar baroh ki bahaïing bahasem ki jynjar, I nongpang I syrtok, bad ki nongsumar ki dukha mynsiem baroh shibnai arbnai ne shisnem, khlem jingmih kaba bha na ka bynta jongno jongno ruh.
Nalor kata kaba dei ban sngewthuh shai ka long lada dei ki nongpang kiba la khrew bad swai, ki shah jynjar bad syrtok ka met ne kino kino ki dkhot met ba ktah ka jingpang, ka ba pynsuhsat ïa la ka mynsiem katba ki bahaïing bahasem pat ki dang ïai kyrmen. Ha ka jaka ba kin ïap suk mynsiem noh kloi lan, hynrei ha ba dang ai jingsumar kaba ym lah shuh ban kyrmen ka la nang pynsyrtoh shuh shuh ïa ki nongpang. Kane ka bynta ba kiba im ki dei ban sngewthuh ban ym pynjynjar ïa la ki baieit bathoiñ kiba don ha jingthiah pang. Ka dohnud briew ka lah ban sngew tohmet ban leh kumta, hynrei ka jingshisha ka long ba kham suk ba ka mariang hi kan rai ïa ka jingim briew ba ym dei ban pynim jubor da ka jingstad briew ka ba pynsyrtok pat ïa ki nongpang ban lutksan ïa ki bahaïing bahasem. Kumba la kdew ha shwa ka met kaba don ryngkat ha syndah jong ki nongpang ka kham lah ban syrpud syrpai ïa kiba kin ïoh tngen ka mynsiem ban ym kyrdit na ka jingpang, ka jingsumar kan long kaba tyngkan katkum ba shah ka mariang ïa ka jingim briew jong ki nongpang. Hangne la kdew ïa ka jingsngew briew naduh ki nongpang haduh ki bahaïing bahasem kiba pynkhreh bad kyrmen ban ïoh jingkhiah kita ki nongpang ha kawei ka liang; ha kawei pat ka liang ki doktor ki nos, ki nongkhaïi dawai dashin ki ai jingkyrmen ïa ki nongpang bad ïa ki bahaïing bahasem ki ba angnud ban ïoh jingkhiah.
Ka jingshisha ka long ban tyngkan ha baroh ki liang da ka mynsiem kaba jynsur ban pynshngaiñ ïa kita kiba dawa ban ïoh jingtngen, lada dei ïa ki bahaïing bahasem ne ïa ki nongpang, namar ka kamram ki nongsumar ka long ban ai la ka jingtbit katba lah ban pynjlan ïa ka jingim. Ka jingieit ba shisha ïa la ki para bynriew la ha ïing ha sem ne ha ka imlang sahlang ka long ban pyrkhat pynshongñia katkum ka jingshisha bad ban kiar na ka ba lung mynsiem palat, khlem nongrim. Kane ka rukom ka dei ban long salonsar ïa ki paidbynriew shityllup, khnang ba kiba pang kin ym syrtok bad kin ïap suk katkum ka bor mariang, ki bahaïing bahasem kin kham sting ka pyrkhat bad kynjai ka dohnud, namar ki nongsumar pat ka dei ka jingtbit kaba ki kamai kajih da ka jingpyrshang ka ba kynsai tam.
Hapdeng kine kiei kiei ka don ruh ka kynpham ïa kito ki ba shim kabu na kane ka rukom batai pynshai ïa ka jingshisha ha ka imlang sahlang. Kata ka kynpham ka lah ban long ruh kum kaba maham ïa kito ki briew kiba syntan bad ba kheiñ sting ban pyndep la ka kamram ban sumar sukher ïa la ki baieit bathoiñ kiba don hapdeng ka pang ka jhia, ka khrew ka swai. Kito kiba ym phikir ban sumar sukher ïa la ki kmie ki kpa, hynmen para ha la ka ïing ka sem, ka long kaba sang ban leh bym suitñiew ïano ïano haba ki don hapdeng ka pang ka jhia ka khrew ka swai. Ha ka juk mynta lei lei la jyllei bha kum kita ki khun jynreiñ kiba mih na ka doh bam ïa ka doh, kumta ka long ka jingmaham ba ka nong kan sa wan hap shop ynda la noh tymmen kita kiba dei ban kitkhia ïa la ki bahaïing bahasem lada ym suitñiew lane ieh beiñ hapdeng ka pang ka jhia ka khrew ka swai. Ka shemlanot kan wan hiar raibi ha la ka pali lada khlem suitñiew, bad ka nong babha kan urlong ha kita kiba la pyndep la ka kamram ban shim jingkitkhlieh ha la ka bynta lajong.
