Shillong, Nailar 28
Ha ka step jong ka sngi Palei, ki pulit phong jaiñ ïong hapoh ka jingïalam u DSP lem bad ki CRPF ki la syrtap hapoh ka Orchid ha Polo bad ban khang bad nym shah satia ïa ki dkhot bad nongïalam ka Hynñiew-trep Youth Council (HYC) ban ïaid sha-khmat bad ka jingkhynra bar jylla bad khynra drok.
La ïohi ba ha ka por ba ki nongïalam bad dkhot ka HYC ki la rung shapoh ka jaka trei kaba don ha Orchid, Polo, ki pulit SOT bad ki CRPF ki la don bad syrtap ha kane ka jaka. Ha kane ka por ka la don ka jingïakren hapdeng ki nongïalam ka seng bad ki heh pulit, haduh ba ka la poi ruh sha ka jingïapyni bad pynksan ïa la ki nia.
Katkum ka durkhih kaba la paw, na ka liang ki pulit ki la khang halor ka nongrim jong ka jingbym wanrah jong ka seng da ka jingthoh halor ka jingthmu ka jong ki, bad ong ba lada ki kwah, kin hap ban ïaid katkum ki kyndon jong ka aiñ hynrei ym ban shu shim jubab tang da ka jingïakren ktien.
Kumjuh ruh na ka liang jong ki nongïalam HYC, ki la pynpaw ba kan dei beit tang ka jingtalasi bad khynra ïa kane ka jaka halor ka jingïoh jingtip ba ki lah ban don ki briew kiba wan rah drok bad ki la pynpaw ruh ba kan long shngaiñ naba la ïadon lang bad ki pulit.
Ka HYC ha ka 28 tarik u Nailar 2025, kumba ka ju leh na ka por sha ka por ban pynlong ïa ka jingkhynra ïa ki bar jylla kiba wan bylla sha ka jylla khlem da biang ki kot ki sla bad ruh ka jingïai bteng ban khynra ïa ki jingdih pynbuaid u ‘drok’ hynrei kane ka jingthmu ban pynlong ïa ka Sier Lapalang Operation (SLO) ne ban khynra ïa ki bar jylla ha Orchid, Polo ka la pulom noh namar ba ki bor pulit, ba kynthup naduh ki pulit SOT, ki CRPF bad ki BSF ki la ap lypa hapoh katei ka jaka, ban khang pyrshah ïa ki dkhot ka seng ban leit khynra ne talasi ïa ki briew ba trei bylla.
Ha kane ka por ka la don ka jingïa pyninia hapdeng ki ar liang, ki pulit ki la bthah ïa ki nongïalam ka seng ba kin ïaid katkum ka aiñ, katba ki nongïalam ka seng pat ki la pynphai nia da kaba ong, “Haba la don maphi ki briew jong ka aiñ, ka la biang ban leit khynra lang bad ki dkhot ka HYC bad ki paidbah ruh kin ïohi ba ka seng ka leit lang bad ki pulit”.
Katei ka jaka ba thmu pynlong ka seng ïa ka jingkhynra bar jylla ka dei ba don mar pyrshah bad ka ïingsah u Myntri Rangbah ka jylla u Conrad K Sangma.
Hadien ba ki dkhot ka seng ki la rung shapoh kim shym la ïoh lad shuh ban leit khynra ïa ki bar jylla ba trei bylla ha katei ka jaka bad ki la hap ban sangeh noh tang shiteng por namar ka jingkhang lad ki bor pulit.
Haba kren sha ki lad pathai khubor u Bah Donbok Kharlyngdoh, Vice President ka seng u la ong, “Ngi la dep thoh sha ka Joint Commissioner ka Labour ba ki kwah ban pynlong ïa ka jingkhynra ban peit ïa ka jingdon ki briew ba nabar kiba wan bylla ha Polo namar ba ngi ïoh jingtip ba bun ki briew ba nabar ba wan bylla ha katei ka jaka kim don ïa ki kot ki sla ba la ïoh na ka Labour ne napoh ka District Council.”
“Ka jingleit bad thmu ka seng ban khynra ha katei ka jaka ïa ki bar jylla, ba kiba don ïa ki kot ki sla kiba biang ai kin trei bad ïaid shakhmat ïa ka kam bad ïa ki bym biang ka long ban phah leit phai noh ïa ki sha ki jaka ba ki wan,” la ong u Bah Donbok.
U la ong ruh ba ka imlang ka sahlang ka sakhi ïa ka jingkharoi jong ki samla kiba la ngop ha u ‘drok’ ka ïaid bha ha kato ka jaka bad ka seng ka ïoh jingtip ba kine ki bar jylla kiba wan ban trei bylla ha katei ka jaka ki wanrah ruh ïa ki mar ban ïadie ïathied, hynrei u la bynrap ba kaba sngewsih ka long, hashwa ban rung shapoh la shah khang noh ha ki bor pulit ne ki briew ka Sorkar.
Ha ka jingshisha katne ka jingbun ki pulit la dei ban buh ïa ki ha Mukroh bad Lapangap, Langpih bad kumta ter-ter hynrei phewse ha kita ki jaka ba donkam, ban shngaiñ ki paradoh parasnam hynrei ki wan pynban hapoh pdeng sor ha Polo, la ong u Bah Donbok bad bynrap ruh ba kane ka pynpyrkhat ïa ka seng ba ka lah ban don kaei re kaei ba haduh ki ophisar ba hakhlieh duh ruh ki ïadon lang ha katei ka jaka. Da kaba kynnoh ba kane ka la dei kata ka jingtrei ne jingktah jong kita kiba ju ïa khot ki ‘High Level’.
Shuh shuh u la ong, “Kumba ka HYC ka la sdang ban khynra ‘drok’ naduh ki ar snem ba la leit. Ngin nym lah ban pynduh naduh tynrai namarba don kiba kum kine ki briew, ngin nym lah ban kynthoh ban kynnoh, hooid ki don ki pulit kiba bha kiba ïatreilang bad ka seng, hynrei lada ka long kum ha kane ka sngi, ka pynartatien ïa ka seng, ba ïoh don eiei sha lyndet ba kine ki pulit ki leit ban ïada ban buhrieh ïa kitei ki briew.
U la ong ka thaiñ Polo ka dei ka ‘Hotspot’ ne ka jaka pdeng jong u ‘drok’. Kumta u la bynrap ba ka jingkhang ki bor pulit ïa ki dkhot ka seng ban leit khynra ïa ki bar jylla ka lah ban don eiei sha lyndet.
Ka seng hi kan nym shong thait bad kan ïai bteng beit ban khynra ïa ki bar jylla bym biang kot biang sla ba wan trei bylla hapoh ka Jylla bad khamtam eh ban pynduh jait ïa u ‘drok’, la bynrap u Bah Donbok.
