Nongstoiñ, Nailar 28
U Sordar ka shnong Mawsikar u Bah T Nonglang u la ong ba ka shnong Mawsikar horkit hordang nangne sha-khmat kan ym shah shuh ïa ki kam pynroi jong ka Assam ba kin dang pyntrei hapoh ka shnong bad kan ïaleh ïa kane haduh ba kut khlem ka jingkynrandien. Ïa kane na ka liang u Bah T Nonglang kum u Sordar ka shnong Mawsikar u la pynpaw hadien ka jingleit ïakynduh ïa u Deputy Commissioner ka West Khasi Hills ha ka sngi Palei ha ka jingdonlang ka Federation of Khasi Jaiñtia & Garo People (FKJGP) Ri Mulliang Circle, ka Khasi Student Union (KSU) Ri Mulliang Circle ha ryngkat ka shnong Mawsikar ban dawa pynsangeh ïa ka jingpyntrei ïa ka surok katba ka Sorkar kam pat lah ban pynbeit ïa u pud u sam hapdeng ki ar Jylla.
Na ka liang u Bah Biangboy Sangriang, President ka KSU Ri Mulliang Circle u la pynpaw ba ka Assam na ka por sha ka por ka ju leh ïa ki kam ban skud jubor ïa ki jaka khappud ha ka thaiñ Langpih wat hapdeng ka jingpyrshah jong ki nongshong shnong.
U la ong ba kum ka seng kim kwah ïa kino kino ki kam pynroi katba ka Sorkar kam pat lah ban pynbeit ïa u pud u sam bad lada dei ban wanrah ruh kan dei beit tang kiba wan napoh ka Jylla Meghalaya.
Na ka liang u Bah Serbilin Lyngdoh, President FKJGP Ri Mulliang Circle ruh u la pynpaw ba kane ka dei ka jaka ba ki paidbah ki la thrang ba ïa ka jingpynbeit ïa u pud u sam dei ban pyndep noh hynrei haduh mynta ka dang sahteng bad na ka liang ka Assam ruh ka bteng ban leh ïa ki kam kyntur pud kaba ym lah ban pdiang.
“Lada phi ai ki kam pynroi ne ki skhim baheh katno katno ruh, ngim kwah ban shah pynhap sha Assam bad ka seng kan ïai pyrshah lada dei ha madan ne lyngba ki jingïakhih ruh ban dawa ba ka Sorkar kan pynbeit noh ïa u pud u sam,” ong u Bah Serbilin.
Shuh shuh halor kane ka jingjia, na ka liang ka Hynñiewtrep Youth Council (HYC) Ri Mulliang Circle pat hapoh ka jingïalam u samla Disterborlin Wanniang, President bad samla Shaiñborlin Syiemlieh General Secretary ha kajuh kane ka sngi ki la hiar sha Mawsikar bad Langpih ban ai mynsiem ïa ki paidbah.
Na ka liang jong ka seng ka la lap da la ki jong ki khmat ba ka la jia shisha kumba la pynsngew da ki nongshong shnong, ong ki nongïalam ka HYC.
U samla Disterborlin Wanniang u la ong mar ïa bna ïa kane, ka HYC kala pyntip ha u DC bad SP ka West Khasi Hills ba kin ïarap kloi ïa ki paidbah ka thaiñ kumba ka seng ka la dep pynlong jingïalang bad ki paidbah ka thaiñ, la rai ban nym shah ïa ka Sorkar Assam ban wan shna surok namar yn ap shuwa ïa ka jingpynbeit pud.
Shuh shuh ki nongïalam ka HYC ki la ai khublei ruh ïa ki paidbah nongshong shnong ka shnong Mawsikar bad kiwei ki shnong ha Langpih kiba la shimkhia ban ïa ap haduh lai sngi lai miet ban beh ïa ki briew na Assam.
Ha kajuh ka por ka HYC ka ai khublei ruh ïa ka ophis u DC bad ïa ki pulit kiba la shimkhia bad shlur ban ïada ïa ki paradoh parasnam katei ka thaiñ.
