Shillong, Nailar 28
U Myntri ba khmih ïa ka tnad kam jngohkai pyrthei u Bah Paul Lyngdoh u la ong ba ka Khyndailad kan sa ïoh ïa ka dur kaba thymmai pura hadien ba la dep ban pyntrei ïa ka kam ban pynitynnad.
Haba kren sha ki lad pathai khubor ha ka 28 tarik u Nailar 2025 u Bah Paul u la pynpaw ba ka sorkar ka la thmu ban wanrah ïa ka jingkylla kaba heh bha ha Khyndailad bad la dep ruh ban mang ïa ka pisa.
“Ngi khmih lynti ïa ka por hadien ka jingkut noh ka aiom lyiur ha kaba ngin sa lah shisha ban sdang ïa ki kam ha Khyndailad bad phin sa ïohi ïa ka dur kaba thymmai pura ka Khyndailad,” la ong u Bah Paul Lyngdoh.
U Bah Paul Lyngdoh u la ong ba katkum ka jingïohi jong u, kane ka jaka kan don ïa ki jingitynnad kiba bha tam, ka jingtem bad ki sur, ki jingpynthaba da ki light, ki jaka shongkai kiba ïadei bad ki nongleit nongwan ha Khyndailad.
U Myntri u la ong ruh ba ki nongkhaïi ha katei ka thaiñ ki la ïoh jingmyntoi na ka jingpynkynriah ïa ki nongdie jingdie madan sha ki jaka ba la buh kyrpang.
U la pynthikna ban shim khia bad ka Shillong Municipal Board (SMB) halor ki mat kiba thymmai kiba la mih dangshen khamtam ïa ka jingkynnoh ba don ki kali ba ïaid wat ha kapor bym shah ban ïaid ruh.
