Nongpoh, Nailar 29
Ka kynhun jong ki nongtrei kontraktor jong ka Ri Bhoi District hapoh ka shatri jong ka Ri Bhoi Government Contractors and Suppliers Association (RBGCSA) ha ka Sngi Thohdieng ki la lum jingïalang ha Nongpoh ban ïakren halor ki jingeh ba ki ïakynduh, khamtam ha kaba ïadei bad ka jingbym ïoh kam ïoh jam bad kiwei-kiwei de ki jingeh kiba ki ïakynduh.
Ha kane ka sngi, la sakhi ïa ka jingwan ïashim bynta jong ki spah ngut ki kontraktor na kylleng ka distrik kiba la pynpaw ïa la ki jong ki jingeh ba ki ïakynduh, khamtam ka jingbym ïoh kam ïoh jam shuh. naba kiba bun ki kam kiba mih hapoh ka distrik ruh la wan trei bad knieh noh da ki briew na shabar ka distrik.
U Bah Plielad Tiewsoh, Vice-President jong ka RBGCSA haba kren sha ki lad pathai khubor hadien katei ka jingïalang, u la pynpaw ïa ka jingkmen ba ka jingïalang ka long kaba seisoh ha kaba la ïoh ban ïathir ïatai ïa shibun ki mat kiba kum ki nongtrei kontraktor ki kynduh jingeh ha ka distrik.
U la ong ba lyngba kane ka jingïalang, la shim ïa ka rai ban pyrshah jur halor ka jingaikam tang ïa uwei u briew khlem da phiah lang, ka pynduh kam duhjam ïa ki kontraktor na ka distrik bad khamtam ki kam ki jam kiba kot da ki klur tyngka, la ïoh beit ban trei tang da ki kontraktor na shabar ka distrik kiba don jingïadei bad ki Myntri Sorkar katba ki kontraktor na ka distrik pat, ki hap ban shu shong khlem kam khlem jam.
U ïathuh ba ka seng ka pyrshah ruh ïa ki kontraktor kiba bam armaloi, naba kane ruh ka ktah bha ïa ki kontraktor kiba trei beit thik tang ïa kane ka kam da kaba kdew ba ki don bun ki ophisar, ki nongtrei Sorkar bad nonghikai ruh kumjuh kiba trei ïa kiba bun ki kam ki jam bad kyntu ïa ki bor dei khmih ka Sorkar ba kim dei satia ban ailad ïa kum kine ki jait.
Sa kawei de ka jingeh kaba kum ki kontraktor ha ka distrik ki ju ïakynduh ka dei ka jingsahkut jong ki ‘Bill’ lane pisa ïa ki kam kiba ki lah dep ban pyntrei, katba kito kiba don jingïadei bad ki heh ki haiñ, ka ‘Bill’ jong ki ka lait beit khlem jingwit, la ïathuh u Bah Plielad Tiewsoh.
Halor kitei ki jingeh, u Bah Plielad Tiewsoh u la ïathuh ruh ba ka seng shen kan sa leit ban ïakynduh bad ai jingthoh sha u Myntri Rangbah ka Jylla, u Conrad K. Sangma ban ïakren halor kine ki jingeh bad ban dawa ba ka Sorkar ka dei ban pynthikna ba 80 persen jong ki kam hapoh ka distrik dei ban ai sha ki kontraktor ‘local’ bad kyntu ruh ïa ki 5 ngut ki MLA jong ka distrik ba kin shimkhia bad phaikhmat lem halor kane ka jingeh jong ki kontraktor ka distrik.
