Don tang u wei u doktor ha Veterinary Nongtalang ban peit haduh 28 tylli ki Shnong: HYC

Shillong, Nailar 29

Ka Hynñiewtrep Youth Council (HYC) War Jaiñtia Circle hapoh ka jingïalam u President u samla Youdahunki Shylla ha ka 29 tarik u Nailar 2025 ka la leit ban buh da ka jingthoh sha ka Director ka Animal Hus-bandry and Veterinary ka Dr.M.Kharshandi ban dawa na ka tnat ba kan kyntiew noh ïa ka Nongtalang Veterinary Aid Centre sha ka Veterinary Dispensary.

Haba kren sha ki lad pathai khubor u samla Youdahunki u la ong ba ha ka jingleit ban jurip jong ka seng, la lap ïa shibun ki jingduna ha katei ka jaka sumar mrad bad khamtam ba u don tang u wei u doktor.

U la ong ruh ba u ne u doktor un leit tang ha kano ka shnong  namar u don tang marwei nalorkata ruh ka kam ka  long kaba khia bha ïa u hangtei.

“U ne u doktor u hap ban peit haduh kumba 28 tylli ki shnong, kaba naduh Nongtalang, Dawki ter ter shaduh ki jaka khappud. U wei u doktor un peit lut ïa baroh kine ki 28 tylli ki shnong kam dei kaba suk ïa u ban beh man ka sngi” la ong u samla Youdahunki.

U la ong ruh ba haduh mynta katei ka Veterinary Aid Centre ba don ha Nongtalang, kam pat don wat ïa ka bording na ka tnad lajong bad ka um ruh ka long ka bym biang.

Shuh shuh u la bynrap ba ka Sub-Division Amlarem ha u snem ban wan, kata u snem 2026, kan sa dap 50 snem  bad ka seng kam sngewhun ba kam pat biang ki jingdonkam ha katei ka jaka.

U la ïai ban ruh ba ka seng hi ka dawa ban kyntiew noh ïa katei ka Veterinary ha Nongtalang namar haduh mynta ka dang sah khongreng beit da ka ïingtnum bad shalyndet jong kane ka Vaterinary ruh ki dang don ki jaka ba dang kham biang lada kin shna pynheh shuh shuh. 

Kumta u la ïathuh ba halor kane ka jingdawa ka seng, na ka liang ka Director ka la kular ba kan sa shimkhia ïa kane ka mat jingdawa.