Shillong, Nailar 29
Ka jylla Meghalaya ka la ïasnohktilang bad ka ri hi baroh kawei na ka bynta ban rakhe ïa ka National Sports Day da kaba ka la pynkup burom ïa 136 ngut ki nongïalehkai lem bad ki 22 ngut ki coach kiba la lah ban khur takma ha ka 6th Meghalaya Games 2025 lem bad ka jingsam ïa ki ‘cheque’ hapoh ka YESS Meghalaya sha ki 103 ngut ki nongïoh jingmyntoi ha ka jinglut kaba T. 45 lak.
Ïa kane ka prokram ba la pynlong da ka tnat ïalehkai jong ka Sorkar Jylla ha ka nongbah Shillong bad ha Tura ban pyni ïa ka jingangnud jong ka Jylla ha ka ban kyntiew ïa ki sap ba nylla jong ki khynnah bad ban pynbiang ïa ki jingtei na ka bynta ki jingïalehkai ha kylleng jong ka Jylla.
Hadien ba la sdang ïa ka YESS Meghalaya ha u snem 2022, ka jingthmu ba kongsan jong u Myntri Rangbah ka Jylla u Conrad K. Sangma ka long ban kyrshan pisa sha ki seng jong ki samla, ki society, bad ki seng trei mon sngewbha ha kylleng ka jylla. Ïa kane ka prokram la shna khnang ban pynkupbor ïa ki samla da kaba pynlah ïa ki jingpynsngewthuh paidbah, ki jingthmu ban ai jinghikai, bad ki kam kiba bun jait kiba pynkhih ïa ka jingïashim bynta ha ka imlang sahlang bad ka jinglong nongïalam jong ki samla.
Haba ai jingkren ha katei ka sngi, u Myntri ka tnat ïalehkai u bah Shakliar Warjri kum u kongsan, u la pynpaw ïa ka jingdonkam jong ka National Sports Day kum ka jingpynkynmaw ïa ka jingshimkhia jong ka jylla ha ka jingkoit jingkhiah, ka jingïadon bynta lang, bad ka jingpynkupbor ïa ki samla lyngba ki jingïalehkai.
U la ong, “Naduh u snem 2018, ka tnad ïalehkai ka la nang kiew stet bha. Wat hapdeng ki jingeh baroh, ka sorkar ka la lah ban kyntiew ha ki kam ïalehkai. Ka jingthmu jong ngi ka long ban lah ban pynmih ïa ki nongïalehkai na la ka jong ka ri wat haduh ka Olympic ka ban wan.”
Na ka liang U Myntri u la pynpaw ïa ka jingïaid beit ïaid ryntih jong ka Meghalaya Games kaba long shi bynta ban kyntiew ïa ki jingïalehkai ha ka Jylla. U la kdew ruh ba na ka liang ka sorkar ka wanrah ïa ki jingkylla kiba kongsan lyngba ki jingtei ïa ki jaka ïalehkai, ka jinghikai pyntbit, bad ka jingkyrshan na ka bynta ki nongïalehkai, katba ka pynrung ruh ïa ka mynsiem ka jingaiti bad ka jinglong ba ryntih na ka bynta ki nongïalehkai..”
U la pynbna ruh ba ka Megha Fit Phase 1 da ka jingbei tyngka kaba nyngkong palat T. 20 lak tyngka, da kaba ban jur ïa ka jingdonkam ban kyntiew ha ka koit ka khiah ïa ka Jylla hi baroh kawei. “Ka Jylla kan sa thaw shen ïa ki jaka sah (sports hostel) na ka bynta ki nongïalehkai kiba don sap, da ka jingmang pisa kaba heh haduh T. 100 klur kaba la dep ban mynjur na ka bynta kane ka jingthmu,” u la bynrap.
Katba ha Tura, ïa kane ka jingïalang la pynkup burom la ïadon lang da u Nipon Hajong, Additional Deputy Commissioner ka West Garo Hills, uba la ban jur ïa ka jingkylla ha ki jingïalehkai na ka bynta ban wanrah ka jingïatylli bad ka jingbha jingmiat.
