Shillong, Nailar 29
Ka lympung ïalehkai Indian Super League (ISL) kan wanphai biang ha u Nohprah mynta u snem na ka bynta ban pynkut noh ïa ki taïew ka jingartatien halor ka lawei jong kane ka lympung.
Kane ka rai ka long hadien ka jingtyrwa lang kaba la wanrah da ka All India Football Federation (AIFF) bad ka Football Sports Development Limited (FSDL) sha ka Ïingkashari Supreme Court ha ka 28 tarik mynta u bnai.
Kumba ka paw kane ka samoi ïalehkai ka la don hapdeng ka jingartatien hadien ba ka FSDL, kaba long ka nongkyntiew ïa ka ISL kaba la kyrshan da ka Reliance, ka la pynbna ha ka 11 tarik u Naitung ba ka sangeh namar ka jingïateh kular jong ka Master Rights Agreement (MRA) kan kut noh ha u Nohprah jong u snem 2025.
Katei ka ïingbishar ba hakhlieh duh ka la bthah ruh ïa baroh arliang mamla ba kim dei ban ïashim bynta ha kano kano ka jingïakren ban pynjlan ïa ka jingïateh kular tad haduh ban da pynbeit ïa ka riti pynïaid kaba thymmai jong ka AIFF.
Haba jubab ïa ka jingbthah jong ka Supreme Court ba la pynmih ha ka 22 tarik mynta u bnai, ka AIFF bad ka FSDL ki la ïakynduh ha Bengaluru ha ka 25 tarik mynta u bnai bad ki la mynjur halor ka jingpruid dak na ka bynta kane ka lympung.
Katei ka synjuk kan hap ban sdang ka jingkhot tender kaba thymmai na ka bynta ban thung ïa ka kynhun pynïaid ïew na ka bynta ka ISL haduh ka 15 tarik u Risaw, da ka jingmynjur jong ka Asian Football Confederation (AFC). Ka FSDL ka la rai ban ïehnoh ïa ka hok na ka bynta ka jingïakren bad ka hok ban ïakhun, kaba la plie ïa ka jingkhang na ka bynta ki nongwan thymmai ban pynïaid ïa ka lympung ïalehkai phutbol ba paw jong ka ri India.
Ban pynthikna ïa ka jingïaid beit bad ka jingpynkhreh jong ki nongïalehkai, ka jingthmu ka kynthup ruh ban pynlong ïa ka Super Cup lane ka jingïalehkai kaba long syriem ha ka rukom pynïaid ka AIFF hashwa ban sdang ka ISL.
Lada mynjur, kane ka jingtyrwa ka mut ba ki nongkyrshan ïa ki kynhun ïalehkai phutbol ki lah ban sakhi ïa ka ISL 2025-26 kaba sdang ha u bnai Nohprah mynta u snem.
