Shillong, Nailar 29
U Commissioner & Secretary ka tnad ki kam jngohkai pyrthei, u Bah Cyril Diengdoh u la ong ba ka komiti kaba la thaw da ka Sorkar Jylla ban khmih ïa ki jingdawa jong ki seng ki nongñiah ‘Tourist Taxi’ ka la ai katto-katne ki jingai jingmut kynthup ïa ka jingai ‘subsidy’ na bynta ka bai pynïeng kali ha Kad Liengsuiñ Guwahati.
U la pynshlur ruh ïa ki seng ba kin pynsngew ïa kiwei-kiwei pat ki mat (kiba ki lah ban don) bad ka Sorkar kan sa ïakren halor kita.
Kane ka jingkren jong u ka long hadien ka jingïakhih kaba dang shen kaba la pynlong da ka All Khasi Meghalaya Tourist Taxi Association (AKMTTA) kaba la dawa na ka Sorkar ban pyrkhing ïa ki ‘Tourist Taxi’ kiba wan na shabar ka Jylla ban leit sha ki jaka jngohkai pyrthei ha kylleng ka Jylla Meghalaya.
“La pynlong bun tylli ki jingïalang bad ki seng bad la ïakren bniah halor kiba bun ki mat naba kane ka donkam ïa ka jingïamir-jingmut bad baroh ki nongshim bynta, ym tang ki seng jong ki ‘Tourist’ taksi, ki nongpynïaid ‘Hotel’ bad kiwei-kiwei. Kane ka komiti ka la ïakynduh la bunsien bad la ïasam ruh ïa ki jingthoh sha kine ki seng,” u la ong.
“Ngi la ai katto-katne ki jingai jingmut kum ka nuksa, kynthup ban ai ‘subsidy’ ïa ka bai pynïeng kali jong ki ha Kad Liengsuiñ Guwahati naba kane ka dei kawei na ki jingdawa – namar ki ong ba ka la heh palat. Kumta ka tnad ka dang peit bniah ïa kata ka kam bad yn sa shim ïa ki rai kiba ïahap bad kino-kino kiwei pat ki mat kiba ki don, nga sngew ba ki dei ban rah sha ka Sorkar bad ngin sa ïakren bad ki ha ka por kaba biang,” la ong u Bah Diengdoh haba kren sha ki nongthoh khubor ha ka Sngi Thohdieng.
Haba kylli hato kum kane ka jingdawa kan don jingktah ne em, u Commissioner & Secretary u la ong ba ïa kine kiei-kiei baroh hap ban peit bniah na baroh ki liang namarba ki don ki mat bapher-bapher kiba don jingïadei kumjuh ki kynthup ruh ïa bun ki nongshim bynta.
“Kumta kano-kano ka rai kaba hap ban shim, ngi hap ban phikir bha, thew ïa ka bad peit ïa ka jingktah kaba ka lah ban don bad namarkata, ka komiti ka la peit ïa ki lad ki lynti bapher-bapher ha kaba ngi lah ban shimkhia ïa kine ki mat bad ban ïakren bniah balei ba ka long kaba eh ban pyntreikam ïa katto-katne ki jingai-jingmut kiba ki la pynsngew namar kine kiei-kiei baroh,” u la ong.
