Tura, Nailar 29
U Myntri Rangbah ka Jylla, u Conrad K. Sangma ha ka Sngi Thohdieng u la ïakynduh ïa ki nongmihkhmat Nokma na ki bynta bapher-bapher jong ka Ri-lum Garo hapoh ka jingïalam u President ka GSU, u Tengsak Momin.
Haba ai jingkren ha ka jingïalang, u Myntri Rangbah ha kaba sdang u la pynpaw ka jingsngewnguh sha baroh ki nongïalam bad ki kynhun seng bapher-bapher ka imlang-sahlang kiba la wan ban ïashim bynta ha kane ka jingïalang ban ïakren halor ki mat bapher-bapher khamtam kiba ïadei bad ka jingeh kaba dang ïaid ha GHADC.
U la ong ba ka GHADC ka don ha ka jingeh kaba khraw ha ka liang ka pisa-tyngka bad lada ym lah ban shimkhia, kan wanrah pat ïa ki jingktah kiba kham heh na bynta ka Council.
“Ka jinglum khajna jong ka GHADC mynta u snem ka long tang kumba T.25 klur, katba ka jingpynlut tulop tang na ka bynta ki nongtrei ka long kumba T.70 klur – kaba wanrah ïa ka jingthylli kaba khraw hapdeng ka jingpynmih bad ka jingpynlut bad hapoh kine ki jinglong-jingman, ka Sorkar Jylla ka la wan ban tuklar tang ban wanrah ïa ki jingkylla ha ka liang ka pisa-tyngka bad ka jingskhem ha GHADC,” u la ong.
U la ban biang ba ka Sorkar Jylla kam don bor halor ka jingtreikam jong ka GHADC.
“Ka jingtyrwa jong ngi ban shimti haba ïadei bad ka tulop jong ki nongtrei ka GHADC naduh ka 1 tarik u Naiwieng, 2025 ka dei tang ka jingkyrshan pisa ne ka ‘bail out package’ na ka bynta ka bha ka miat jong ki nongtrei bad shi bynta jong ka jingwanrah jingkylla ha ka liang ka pisa-tyngka kumjuh ban wanrah ïa ka jingskhem ha ka Council,” u la ong.
Shuh shuh u la pynpaw ba ki lad jingpynkylla kin kynthup ïa ka jingdon ïa ki ‘Service Rule’ na bynta ki Council, ‘Procurement Policy’, ‘Rationalisation and Re appropriation of Employees’ bad kiwei-kiwei tang ban wanrah ïa ka jingskhem ha ka jingpynïaid ha ka liang ka pisa-tyngka.
