Moscow, Nailar:
Ha ka sien ba nyngkong eh, la ong ba ka jhad jong ki shipai duriaw ka Ukraine, ka Simferopol, kaba la ong, ba ka dei ka jhad kaba heh tam, kaba la buh da katei ka ri ha kine ki shisnem tam, ka la shah thombor ha ki ‘drone’ jong ka Russia bad ka la ngam jyllop noh ha katei ka wah Danube jong ka Ukraine ha ka Sngi Balang.
Ka jhad Laguna-class, kaba heh pdeng, kaba la shna na ka bynta ka radio, electronic, radar, ka la shah ther ha ki ‘drone’ jong ka Russia katba ka dang ïaid pahara ha ki um jong ka wah Danube, kaba shi bynta jong ka, ka don ha ka thain Odessa jong ka Ukraine, ong ka khubor jong ka tnat iada ri ka Ukraine.
La ong ba kane ka long ka sien jop ba nyngkong eh jong ka Russia ban ioh pynjulor bad pynjot ia ki jhad heh jong ka Ukraine, da kaba pyndonkam tang da ki ‘drone’.
