Aizawl, Nailar:
Ki bor pahara, ha ka janmiet jong ka 28 tarik Nailar, ki la ïoh ban kurup haduh 9.6 lak tylli ki dawai kuli methamphetamine kiba shong dor T.144 klur ha ka jingkhynra lang jong ki shipai ka tnat Border Security Force (BSF) kiba hap hapoh ka Sector Headquarters, Aizawl, bad ka Narcotics Control Bureau (NCB) ha Serchhip ha Mizo. Ïa kine ki mar la kit da ka trok Bolero Pick-up kaba don ïa u number MZ01 AE 8791.
La kem ïa lai ngut ki briew ha katei ka jaka bad la ïalam hakhmat ka ïingbishar hynnin ka sngi da ka kynhun NCB. Ki heh sorkar ki la ong ba kane ka dei ka jingshalan drok kaba ar kaba heh tam ha Mizoram ha kine ki lai snem ba la dep, kaba pynpaw ïa ka jingbteng jong ka jylla ban shah ktah ha ka jingkhaïi drok shabar pud.
Shwa ïa kane, u Myntri ka tnad Excise bad Narcotics jong ka jylla, u Lainghinghlova Hmar, u la pyntip sha ka dorbar ba ka Mizoram, ka la don ïa ka jingïap briew na ka daw jong u drok, ha ki 5 snem ba ladep, haduh 351 ngut, ba kynthup ïa 46 ngut ki kynthei.
U Hmar haba jubab ïa ka jingkylli na u nongthaw aiñ ka Mizo National Front u K Laldawngliana u la ong ba 78 ngut ki jingïap ki dei na ka daw jong ka jingdih drok heroin, katba 273 ngut ki dei na ka jingdih buaid drok hapdeng u snem 2020 bad ka 8 tarik Nailar, 2025. Kiba shah pynïap ki don ha ka rta kaba 19 haduh 57 snem. Ka jingïap kaba bun tam ka dei ha u snem 2023 ha kaba ki don 76 ngut kiba ïap. Naduh u bnai Kyllalyngkot haduh ka 8 tarik u Nailar, mynta u snem, ki don 51 ngut ki briew kiba la ïap, ba kynthup ïa hynñiew ngut ki kynthei, namar ka jingdih drok.
Napdeng ki 11 tylli ki distrik jong ka jylla, ka Aizawl ka dei kaba bun eh kiba ïap haduh 274 ngut, bud sa ka Lunglei kaba 69 ngut, bad ka Champhai kaba 58 ngut.
