Shillong, Nailar 29:
Ki nongdie soh ha Laimer, Upper Shillong ki la pynpaw ba ki kwah ban shong die soh kham sharum lada ka surok four-lane na Umshyrpi sha Hynñiewmer ka la dep namar ha kane ka jaka ba shong mynta ka surok ba thymmai ka la ïaid kiar noh kham sharum.
Kane ka jingpynpaw ki nongdie soh ka dei ha ka jingïakren kyrpang ban sngap ïa ka jingsngew jong ki hadien ba u symbud myntri rangbah ka jylla u bah Prestone Tynsong uba peit ïa ka tnad surok u la pynpaw ban pyndep noh hapoh u bnai Nohprah ïa ka surok saw lynti na Umshyrpi shaduh Hynñiewmer.
Kumban shu pynkynmaw kane ka jaka die soh ha rud surok bah ha Laimer ka dei ka wei ka jaka kaba dang neh haduh mynta kaba dei ka jaka die soh kaba la mih ha ka por jong ka khlam Covid -19 ha kaba ki longkmie kiba bun ki dei na Umlyngka bad na ki wei ki shnong.
Kane ka jaka ba shong die soh kine ki longkmie ka dang hap hapoh ka jingpeit ka dorbar shnong Nongkseh Upper Shillong .
Haba ïa kren bad ki katto katne ki longkmie ba die soh ha ka tei ka jaka ki la ïathuh ba ki la ïa im ja bad kamai na kane ka jaka die soh naduh ki por ba dang don ka khlam Covid -19 tad haduh mynta.
Shuh shuh ki la ïathuh ruh ba ki soh ki kham ïaid bha ha kane ka jaka namar ki nongwan shangkai kiba nabar haba ki ïaid lynti na ka tei ka jaka ki ïa hiar ban ïa thied ïa ki soh .
Kine ki longkmie ki la ïathuh ba ynda la dep ka surok 4 lane na Umshyrpi sha Upper Shillong kim don jaka shuh ban leit trei da kawei ka kam namar ki la im ja na katei ka jaka.
Halor kane kim pat ïoh ban ïakren bad ki bor pynïaid shnong Nongkseh hynrei lada ki ïoh ka lad ki kwah ban shong sha ka jaka kaba biang bad ki kwah ban hiar kham sharum sha ka jaka ba ka don ka surok 4 lane kaba dang shna mynta.
Kane ka surok four-lane ka la ïaid kiar noh ïa ka Laimer ka dei namar la pynïaid na madan phutbol na Sawmer ban ïaid ïa ka khlaw jong ka tnad forest ban poi sharum ka jaka diesoh ha Laimer ban rung shakhmat ka skul Gorkha ter ter sha 101 Area haduh Umshyrpi.
Watla u bah Prestone u la pynpaw ban pyndep ïa kane ka surok ha u bnai Nohprah 2025 hynrei la ïohi ba ka jingtrei ka company ka dang suki bha namar ki don ki bynta ba la shu ieh khlem pat trei haduh mynta.
Ka jingdon kiba die soh harud surok ha Laimer ka la ïarap shisha ïa ki nongleit nongwan namar kim donkam shuh ban leit rung sha ïew khamtam kito kiba don kali bad kiba bunkam namar tang shu hiar ha Laimer ki la ïoh ban rah ïa ki soh kiba bang haba ki leit phai sha ïing.
