Shillong, Nailar 29:
Ka Hynñiewtrep National Youth Front (HNYF) East Khasi Hills, haka 29 Tarik Nailar, 2025, ka la leit ban khynra kynsan ïa ki katto katne tylli ki dukan kiba don ha GS Road ha Khyndailad ha kaba ki la don katto-katne tylli ki dukan kiba hap ban khang noh namar ka jingbym don jong ki ïa ka laisen khaïi ne ka Trading License bad kiba khlem shym la pynthymmai ïa ki laisen kiba la kut por kiba dei ban ïoh na ka Shillong Municipal Board (SMB).
Hadien kane, naka liang ka Seng ka la leit ruh ban ïakynduh ïa ki bor pynïaid jong ka Board ban ïakren sani bha haba ïadei bad kane ka mat.
Naka liang u Bah Steve R. Khyriem uba dei u President ka HNYF East Khasi Hills, ula ong, ba ki don ki dukan kiba khlem pynbiang satia ïa kino-kino ki kot ki sla ba donkam kaba la pynlong ïa ka Seng ba kan phah khang mardor ïa kitei ki dukan.
U Bah Khyriem ula ong ba ki don ki briew kiba dei nabar ka Jylla naduh Kolkata, Assam bad kiwei kiwei ki Jylla ki la ïoh ban plie dukan ha katei ka jaka bad kine ki khlem pynbiang satia ïa ki kot ki sla ba donkam ne ban pynthymmai ïa ki kot ba la kut por.
Shuh-shuh, u Bah Khyriem ula ong ba ka jingleit ban ïakynduh ïa ki bor jong ka Board ka dei ruh ban buh jingkylli ba kumno kitei ki briew nabar ka Jylla ki ïoh ïa ka laisen khaïi bad kiba khlem pynthymmai pat ïa ki laisen jong ki hadien ba la kut ka por.
“Naka liang jong ngi, ngim banse ban pyni da ka kam namar ka Municipal kam shym la leh ïa kano kano kaba dei ban leh khamtam ka Tnad Labour ka bym shym la leh laka jong ka bynta ban khynra haba ïadei bad ki kot ki sla jong kine ki dukan”, ong u Bah Khyriem.
Naka liang u Bah Andrew Lyngdoh uba dei u Secretary ka Seng, ula ong nalor ba kitei ki dukan kim don ïa ki kot ki sla ba biang hynrei ki la pyneh ruh ïa ka Seng da kaba ong ba ki don ïa ki briew napoh ka Municipal ban pynleh ïa ki kot ki sla jong ki lyngba ka ‘online’.
