Shillong, Nailar 29
Ka Meghalaya State Judicial Academy (MSJA) jong ka High Court jong ka jylla Meghalaya, ha ka 26 tarik Nailar 2025, ka la pynlong ïa ka jingïakren kaba shisngi halor ka phangpdeng “Navigating Institutional Intersections: Local Institutions and Legal Frameworks in Criminal Justice System”, ha ka Auditorium jong ka High Court, Shillong.
Ha kane ka jingïalang la lum lang ïa ka kynhun bapher bapher kaba don palat ngut ki nongïashim bynta ba kynthup ïa ki ophisar jong ka Tnad Pulit ka Meghalaya, ki Paralegal Volunteers kiba hap hapoh ka Meghalaya State Legal Services Authority, ki Rangbah Shnong jong ki shnong bapher bapher, ki nongmihkhmat jong Ka Lympung Ki Seng Kynthei bad ki longkmie kiba mihkhmat na ki shnong bapher bapher.
Ka Director ka Meghalaya State Judicial Academy ka Kong Kerpa M.Lyngdoh Nongbri ka la long kum ka nongpynïaid ïa kane ka jingïakren bad ki nongïashim bynta ki long u Bah Syrpailang Marbaniang, Rangbah Shnong ka Pynthorbah, ka Kong Theilin Phanbuh, President, Ka Lympung Ki Seng Kynthei, u Bah Mark Andrew Challam, MCS, Additional Deputy Commissioner uba dei khmih ïa ka Sohra Civil Sub-Division, u Bah Herbert Pynïaid Kharkongor, MPS, Superintendent of Police (City), East Khasi Hills bad ka Miss Bandarisha Kharlukhi, MJS, Secretary, DLSA, East Khasi Hills, ha ka jingïakren kaba la pynleit jingmut bha halor ka jingïakynduh lang jong ka synshar tynrai bad ki rukom aiñ bapura, ha kaba la pynleit jingmut ha ka aiñ NDPS Act, POCSO Act, Protection of Women from Domestic Violence Act bad kiwei-kiwei ki kam bymman. Ki nongïashim bynta ki la wad ïa ki rukom treikam bad ki buit treikam ba la pynshong nongrim ha ka imlang sahlang ban weng ïa kine ki jingeh da kaba suk.
Ka jingïalang ïakren ka la pyni ïa ka jingïakren kaba sngewtynnad na ki nongïashim bynta kiba la ai jingmut kiba kordor bad ïasam ïa ki jingïakynduh kiba don jingmut. Ka prokram ka la pynkut da ka jingkular, kaba pynskhem biang ïa ka jingkular ban pynjylliew ïa ka jingïatreilang jong ki tnat treikam ha kaba ïakhun ïa ki jingeh kiba kongsan ha ka imlang sahlang bad ha kaba pynïaid shakhmat ïa ka jingpynïoh ïa ka hok.
