Mairang, Nailar 29
Kum ka dak jong ka jingïasnohktilang ha ka jingrakhe ïa ka National Sports Day Run 2025 halor ka phang ” Ek Ghanta Khel Ke Madan Mein” bad ruh kum dak ka jingkynmaw burom ïa u khlur ïalehkai hockey ka ri India u Major Dhyan Chand bad kaba dei ruh shi bynta ka Fit India Movement, ka shlem treikam ka Deputy Commissioner ka Eastern West Khasi Hills District ha ka jingïatreilang bad ka District Sports Officer (DSO) ha ka sngi Thohdieng ka la pynlong da ka jingïakop mareh kaba 5 kilometre bad 10 kilometre na ka bynta ki kynthei bad shynrang bad ïakop ñÏah saikil kaba 15 kilometre.
Ïa kane ka jingïakop mareh bad ñiah saikil, la wan ban kaweh lama da u Additional Deputy Com-missioner u Bah A. Nongbri ha kaba la wan shim bynta da ki spah ngut ki nongïashim bynta kynthei bad shynrang bad la sam ruh ïa ki khusnam sha ki nongjop da ka song pisa ha ryngkat ka syrnod.
Ïa kane ka sngi kyrpang jong ki nongïalehkai la rakhe ruh ha ka shnong Umsoit Ground, Kynshi, kaba hap ha Mawtha-draishan C&RD Block, ha kaba la pynlong da ka jingïakop ïatan tyllai. La wan ban sakhi ha kane ka prokram da u MDC ka Mawthadraishan Constituency u Bah Powell Sohkhlet, kum u kongsan ha ka jingdonlang ki nongpynïaid shnong jong ka Shnong Kynshi, ki nonghikai skul, Sport officer bad ki nongïashim bynta.
Ha kane ka jingïakob Tan Tyllai, la wan ban ïashim bynta da 5 tylli ki kynhun shynrang bad 4 tylli ki kynhun kynthei kiba la ïakhun haduh kaba kut da ka jingïalehkai kaba itynnad. Ïa ka nam lahduh na baroh ar liang la rah da ka Kynshi Sports and Cultural Club.
