Shillong, Nailar 29
Ka jingjyllei jong ki kam sniew ha ka jylla katba dang mih ki sngi ka la nang shyrkhei haduh katta katta ha kaba ki briew kim ju salia shuh wat haba shit haba shai ruh ban leh ïa ki kam sniew bad khamtam eh ka jingjyllei jong ki nongdih bad khaii ‘Drok’.
Ha ka sngi Thohdieng ka 29 tarik u Nailar 2025 na ka liang ka Voice of The People Party (VPP) Youth Wing hapoh ka jingïalam u Bah Marbud Dkhar ki la leit ban khynra ïa ki jaka ba jyllei ka jingdih ‘Drok’. Ha kane ka sngi la ïadonlang ruh na ka liang ka VPP Women’s Wing.
Ka VPP ka la sdang ban khynra nongdih ‘Drok’ naduh ïew Polo, kaba dei kawei ka jaka ba jyllei bha ki kam khaïi bad dih ‘Drok’ bad ka la ïaid ter ter sa ha lynti ban mih sha skul BK.Bajoria bad nangta de sa ha Civil Hospital, Shillong.
Ha kane ka jingkhynra, ka VPP ka la lap ïa bun ki kali kamai ne ki kali shimet kiba ïeng thadlad ha ki surok, ki lynti ba kynjah bad kiba long kyndong, ha kaba ka la beh krad shisyndon ïa ki ban ym shah ba kin leit ïeng ha kitei ki jaka.
Ka jingbeh ka seng VPP ïa kitei ki briew ba ïeng thadlad ha ki jaka kyndong kadei namar ba ïoh lehse kitei ki briew kin leh ïa ki kam kiba sniew ha ka ban dih ‘Drok’.
Hadien ba ka seng ka la poi sa ha Civil Hospital ka la lap ïa shibun ki samla Khasi kiba shu shong ha surok, ha ki lynti ki syngkien khlem kam khlem jam bad ha ka jingkylli tohkit ka VPP kitei ki samla ki ïathuh ba ki wan ban shim dawai na Civil. Kumta ïa kitei ruh ka seng ka la beh mardor ba kin leit noh sha ki jaka ba ki sah.
Haba kren sha ki lad pathai khubor u Bah Marbud u la ong ba ka jingkhynra ka seng ïa ki nongdih ‘Drok’ kadei namar ka jingsngewkhia ïa ka jingjyllei ki nongdih ‘Drok’ hapoh ka jylla.
U la ong ba kumba ka seng VPP ka la rai ba kan mih shakhmat ban pynduh jait ïa kine ki jingdih ba sniew bad mynta hi kin ym shongthait hynrei ban pyni da ki kam.
“Kane ka dei ka sienjam ba na ka liang ka VPP ka shim bad ngin dang ïaid shakhmat na kapor sha kapor ban khynra nongdih ‘Drok’. Kumba ngi la kren ha ka jingïalang ban ngin nym kut tang ha ka jingkren hynrei ngin mih madan beit nangne shakhmat ban ïaleh katba lah ban rat dyngkhong ïa u ne u ‘Drok’, la bynrap u Bah Marbud.
U la ong ruh ba khamtam eh ban rat dyngkhong ïa ki nongdih ‘Drok’ kiba la kylla mynta sa ha ka kam tuh kam lute bad khamtam eh ha ki skul mynta kine ki nongdih ‘Drok’ ki peitkhmat bha bad ki jingjia ba shyrkhei ïa ki khynah skul.
Shuh shuh u la ong ba ka VPP hi kam lah marwei ban ïakhun ha ka ban pynduh jait ïa u ne u ‘Drok’ hynrei donkam ka jingïatreilang naduh ki shnong ki thaw. Ki shnong ki thaw mynta ki la donkam ba kin sei noh ïa ki khun samla ba kin pynkhlaiñ noh ïa ka shnong ban ïaleh pyrshah ïa u ‘Drok’.
