Moscow, Nailar:
Ka Russia, ha ka Sngi Palei, ka la sdang ban pyndonkam da ki ‘namding kiba lah ban siat jngai bah sha ka thong ba la thmu bad ia kitei ki ‘namding la siat sha kito ki thaiñ ba don ki ktem shipai jong ka Ukraine, da kaba pyndonkam ia ki tiar thma bapher- bapher, kynthup ia ki namding Kinzhal bad kiwei de ki tiar pynbthei kiba khlaiñ.
Katkum ki khubor, la iathuh ba katei ka jingleit hiar thma jong ka Russia da kitei ki tiar kiba kham khlaiñ bor, ka la ktah jur ia ki katto- katne ki karkhana shna tiar bad ki jaka liengsuiñ, ha kaba ka Russia ka la pyntikna ia ki khubor ba kham mynshwa, ba ka don ka jingshah thombor na Ukraine. Ki shipai jong ka Ukraine ki la kam ba ki la ioh ban khanglad ïa kiba bun ki drone bad ki ‘namding kiba wan poi na Russia bad ki la kam ruh ba ki la jop ïa ki jinghiar thma jong ka Russia ha ki 13 tylli ki jaka bad ba ka Ukraine ka la lah ban tehlakam ia ki jingjulor kiba bun ba ka Russia ka la thmu ban pynjot ia ka Ukraine.
Kawei na ki jinghiar thma, la iathuh ba ka dei kaba la ring dur ha ka CCTV, ha kaba ki dur, ki la saphriang online, kiba pyni ia ar tylli ki namding, kiba la siat ha kajuh ka jaka, ha pdeng jong ka Kiev. Katto katne ki khubor ki la pynpaw ba katei ka jaka ka dei ka ophis jong ka kompeni ïada ri Ukrspecsystems ha ka surok Zhilyanskaya, kaba ki pulit ki la ker kut ha ka Sngi Balang.
Ka Ukrspecsystems, kaba la seng ha u snem 2014, kadei ka jaka shna ia ki liengsuiñ ki bym donkam ban shong ne ñiah da u briew, kynthup ia ka PD-2, kaba lah ban pynpoi jngai bha, ha kaba la iathuh ba la pyndonkam ia ki ha ki jinghiar thma da ki drone kamikaze, kiba don kham shapoh jong ka Russia, kynthup ia ka nongbah Moscow.
Ha kaba kyrpang, u dkhot jong ka Lviv city council, u Igor Zinkevich, u la kam ba ka Russia, ka la thombor ruh ia kawei ka karkhana ha Kyiv, kaba hap hapoh ka jingkhmih jong ka kompeni iada ri jong ka Turkey, ka Bayraktar, ha kaba u la bynrap, ba katei ka jingthombor, ka dei kaba saw kaba la jia hapoh jong kine ki hynriew bnai.
Ha ka taiew ba ladep, ki lad pathai khubor jong ka Ukraine, ki la iathuh ia ka jingpynmih ia u namding cruise, uba la ai kyrteng Flamingo, ha kaba ka jing jngai kaba lah antad, kan poi haduh 3,000 kilomitar bad ka jingkit jong u, ka lah ban kit haduh 1,000 kilogram. Ki dur jong katei ka tiar, ki pyni ia ka jingiasyriem bad ka FP-5 system, kaba ka kompeni iada ri jong ka Britain-UAE, ka Milanion Group, ka la pyni paidbah ha kaba sdang jong une u snem, ha ka jingpyni ia ki tiar ha Abu Dhabi.
Ka Russia ka la kynnoh bunsien ïa ki ri Sepngi ba ki ai jingkyrshan ia ka tnat shipai jong ka Ukraine da kaba pynbiang ïa ki tiar bad ka pisa, ha kaba, ka Russia ka la ong ba kane ka jingshaniah jong ka Ukraine ha kiwei pat ki ri, ka pyni ia ka jinglong mraw jong ka Ukraine hadien- habud namar kam dei ka bor jongka shimet ba ka lah ban ieng haduh kine ki sngi.
