Jowai, Nailar 29
U Principal bad trai ka K.B. Memorial Secondary School Wapung, East Jaiñtia Hills District, u Dr. Heipor Uni Bang u la shah jied ban ïoh pdiang ïa ka ‘National Teachers’ Awards’ 2025 na ka Jylla.
U Dr. Heipor Uni Bang u dei uwei napdeng ki nonghikai ba la pynbna da ka President Droupadi Murmu ban shah pynkup burom ha ka jingrakhe pyndon burom ïa ka sngi kyrpang ki nonghikai ne Teachers’ Day ha ka 5 tarik Nailur.
Kane kam dei ka sien nyngkong ïa u Dr. Heipor Uni Bang ban ïoh ïa ka jingithuh – u la ïoh pdiang ïa ka District Teachers Award ha u snem 2021 bad State Teachers Award ha u snem 2024 bad ha u juh hi u snem u la pyndep ïa ka kyrdan PhD ha ka Environment Management.
U la ïoh ruh ïa ka ‘Lifetime Membership’ ka Red Cross na u Lat ka Meghalaya ha u snem 2018. Nalorkata, u la trei ruh kum u dkhot jong ka Juvenile Justice Board, Khliehriat, bad u la hikai ruh ha Thomas Jones Synod College, Jowai 2014 bad 2017.
U la sdang ban hikai ha u snem 2009 hadien ba u la pyndep ïa ka MSc ha ka Botany bad seng ïa ka KB Memorial Secondary School ha u snem 2013.
