Shillong, Nailar 29
Ka Mawlai SC ka la wanphai da ka jingjop ha ka Shillong Premier League, hadien ba ka la lah ban pynliem noh ïa ka Langsning FC da 1-0 kol ha ka sngi Thohdieng ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da u Banraplang Pyngrope ha ka minit kaba 52, ha kaba u la ïoh ban pyndei da ka khlieh ïa ka bol kaba wan ha ka corner. Kane ka jingïalehkai ha kane ka janmiet ka la long shisha kaba itynnad bad kaba ïakhaid bha.
Ha ka jingshisha, ka Mawlai SC ha kane ka jingïakhun, lah ban ong ba ka la ïoh bun bha ki kabu ksiar ban pynkhih jar, khamtam lei-lei ha ka kylla step, kaba lada shim kaba duna eh ki long lai tylli.
Da kane ka jingjop kaba mynta ka janmiet, ka Mawlai SC ka la kiew mynta sha ka kyrdan kaba ar hadien ba ka la ïoh ban khur 6 point, katba ka Langsning FC kan dei ka jingshah rem kaba nyngkong mynta ka samoi ïalehkai ha ka SPL, bad ban hiar mynta sha ka kyrdan kaba saw.
Ka kylla step ka long ba baroh ar kynhun ki la sdang ban ïa pyni ïa la ka jong ka buit bad ka bor ïalehkai ka jong ki, ha kaba ki kabu ksiar ban thep ïa ka kol, ki la sdang ba kin mihpaw, bad ha ka minit kaba 17, u Loving Suting u la lah ban khyrwit jam bha kham na jngai ïa ka bol kaba la pynlong ïa u rangap kol ka Langsning u Rajat Paul ban kham trei shitom ban khanglad na ka jingshah thep.
Hadien kane, u Brolington Warlarpih, uba la ïoh ban sdang nyngkong eh bad la ka kynhun naduh kaba sdang, u la khyrwit ïa ka free-kick kaba shu lait salit ban pynkhih jar.
Katba na ka liang ka Langsning, u Apborlang Kurbah, u la lah ban khanglad ïa ka Mawlai ban ïoh pynkhih jar hadien ba u la ïoh ban ïada da kaba pyndei da ka khlieh ïa ka bol bad pyllait na ka jingshah thep.
Haba wan ban bteng ïa ka kylla miet, ka Mawlai SC ka la ïai pynpaw ïa ka jingthrang ban ïoh thep kol ha kaba u Robertson Khongriah u la shut ïa ka corner hynrei um shym la lah ban pynurlong.
Hadien kane u Chusrang Sangma uba tbit bad khlaiñ bha ban kawang ïa ka bol, u la pyrshang katba lah ban plie lad ïa ka kynhun ban lah ban wanphai sha ka jingïakhun, hynrei ka jingskhem palat ki rangïalehkai ka Mawlai SC, ka la khanglad lut ïa ka kynhun ïalehkai jong ka Langsning FC ba kan da hap ba kan pdiang ïa ka jingshah rem.
Ha kane ka kynti jong ka jingïakhun, u rephri u Bah Lightstar Kharduit, u la ailad ïa ka Langsning ba kan shut ïa ka corner, kaba la wan hadien ba u rangapkol ka Mawlai SC, u la bat kham slem ïa ka bol ha la ki kti palat ïa ka 8 sekon, kaba dei artad ka rule thymmai kaba la pyntreikam.
Ka jingïakhun ka ban wan kan long ha ka lah sngi U Blei hapdeng ka Rangdajied United FC pyrshah ïa ka Nongrim Hills SC ha ka por 4:30 janmiet.
