Shillong, Nailar 29
Hadien ba kawei ka dur khih ne ka video kaba la shaphriang ha ki rynsan social media, ba u wei u dkhot ka seng Hynñiewtrep Integrated Territorial Organisation (HITO) u la shah kem noh ha ki bor pulit namar ka jingkhaïi ïa u jingdih pynbuaid u ‘Drok’, na ka liang ki nongïalam ka HITO Shillong City da ka mynsiem jingsngewkhia ka bajur, ha ka janmiet jong ka sngi Thohdieng ka 29 tarik u Nailar 2025, ki la mih shakhmat ban pynshai paidbah halor kane.
Haba kren sha ki lad pathai khubor u Samla Balajied Jyrwa General Secretary u la ong ba kane ka durkhih ba shah kem kaba la saphriang mynta ha ki rynsan social media kadei naduh u snem 2023 bad u ne u briew u ba la shah kem ruh um shym la don bynta shuh bad ka seng HITO naduh kito ki snem.
U la ïathuh ba naduh nyngkong hi ba ka seng ka la lap ba u ne u briew u don bynta ha ka ban khaïi ïa u ‘Drok’ hapoh ka Jylla bad mar mar ka seng kam shym la pynslem bad ka la beh noh ïa u naduh u tei hi u snem 2023.
Shuh shuh u la buh jingjylli ruh ba kumno? hadien ba ka HITO ka la leit ban khynra ‘Drok’ hynnin ka miet ha Motphran ter-ter hynrei hadien kumba katto kattne por ei ei ka la mih noh kane ka durkhih ban pynsaphriang lyngba ki social media bad ban thad ïa ka seng.
U la kynnoh ruh ba kane ka dei beit ka jingkwah jong ki briew ne kita ki heh saipan jong ki nongkhaïi ‘Drok’ hi kiba thad ïa kane ka durkhih ban pyntlot noh ïa ka seng bad kidei ki lad buit-tuh bad ki lad buit-poh jong ki briew khnang ban pyntlot ïa ki païa jong ka imlang ka sahlang.
“Une u briew u ba la shah kem ha ki pulit um shym don ka jingïateh ei ei ruh bad ka seng HITO. Kane ka jingjia ba shah kem ruh mynta ka lah dap da ki snem, kaba naduh u snem 2023” la bynrap u samla Balajied.
U la ïathuh ruh ba kane ka durkhih ka la saphriang naduh hynne hi ka step mar sien mih ka HITO ban leit khynra nongdih ‘Drok’, hynrei ka seng hi kam ju don kum kane ban pynjot ïa ka jaitbynriew baroh kawei.
Haba bynrap pat na ka liang u samla Wansuk Lawriniang President ka HITO Mawlai Circle u la ong ba u ne u briew u la wan ban ïasoh bad ka seng ha u snem 2023 bad hadien kata la ïoh jingtip noh ba u dei u ba khaïi ‘Drok’ bad mar mar ki la beh noh shisyndon ïa u na ka seng.
U la ong ruh ba hadien shitaïew ba la shah beh ha ka seng u tei u briew u la shah kem noh ha ki pulit. U la ong ruh ba kane ka jingjia kadei naduh u snem 2023 hynrei kumno pat kan saphriang mynta bad ka jia ryngkhat ruh ba hynnin ka sngi ki dkhot ka HITO ki la leit ban khynra ïa ki nongdih ‘Drok’, la bynrap u samla Wansuk.
“Ngi sngewthuh mynta ba kine ki nongkhaïi ‘Drok’ ruh ki don la ka jong ka buit-tuh jong ki, ba kumno ban pyntroiñ ïa ka seng. Hynrei watla ki la pynsaphriang ïa kane ka durkhih ruh ka seng kan nym salia ngin ïai ïakhun shuh shuh. Katta phi dang pynjah burom hynrei ngi dang skuiñ shuh shuh ban trei bad ban lap ïa ki nongkhaii ‘Drok’ kiba leh baheh bad kiba kham lehstad” la ong u samla Wansuk.
Nalorkata, ka seng ka la maham tyngeh ïa ki briew ba pynsaphriang ïa kane ka durkhih la kalong ki briew shimet ne kino kino ruh ki briew baheh ba haiñ, ba ka seng hi kam tieng bad ong ruh “katba phi dang pynsmiej pyntieng ngin dang ïai bteng beit nangne shakhmat ban khynra ïa ki nongdih ‘Drok’.”
