Shillong, Nailar 29
U Commissioner & Sec-retary ka Sorkar Jylla, Bah Cyril Diengdoh ha ka Sngi Thohdieng u la ong ba ka Sorkar shen kan sa pynbna halor ki lai tylli ki ‘Sub-Committee’ ban ïakren bad ki Autonomous District Council (ADC) ha kaba ïadei bad ka jingtyrwa jong ka ban ai ïa ka jingkyrshan pisa, kynthup ïa ka jingsiew tulop, nalor kiwei.
Katkum ka jingong u Bah Diengdoh, ki komiti kin ïamir jingmut bad ki District Council bad pan ïa ka jingmynjur jong ki shuwa ban pyntreikam ïa katei ka rai.
“Kane ka dei kaei-kaei kaba hap ban leh ha ryngkat ka jingïamir jingmut, kumta sngewbha ap shisien ba la pynbna ïa kine ki komiti, ngin sa ïoh jingtip namar ki kyndon treikam kin long kiba shai bha,” u la ong sha ki nongthoh khubor.
Kine ki komiti kin ïakren bad ki bor synshar jong ka Garo Hills Auto-nomous District Council (GHADC), Khasi Hills Autonomous District Council (KHADC), bad Jaiñtia Hills Autonomous District Council (JHADC) ha kine ki 45 sngi ban wan bad kin sa aiti ruh ïa ka kaiphod sha ka Sorkar Jylla.
Haba kylli, u Bah Diengdoh u la ong, “Namar ka jingeh kaba jia mynta ha ki katto-katne ki District Council, ha kaba ka tulop ka dang sahteng la bun bnai, kumta ka Sorkar ka la shim ïa ka rai halor kumno ban pynbeit ïa kane da kaba ïamir jingmut bad tang hadien ba la ïoh ia ka jingmynjur jong ki ADC. Kata ka long kaba shai bha…”
