Singapore, Nailar:
Ka Iingbishar jong ka Singapore ha ka Sngi Thohdieng ka la pynngat kyndon pyrshah ia utei u nong India bad la kem bad rai set patok syndon ia u haduh 2 snem kynthih, ha ryngkat ka jingshah daiñ kuna kaba SGD 2,000 haba iadei bad ka jingiap jong uwei u nonghikai ka National University of Singapore, ha u snem 2023.
Ha ka 7 tarik u Naitung jong u snem 2023, la ong ba utei u nong India uba la ithuh kum u Natarajan Mohanraj, 28 snem ka rta, u dei u nongtrei bylla bad uba ju ñiah ia ka kali kit tiar na jaka trei. Hynrei ha katei ka sngi, utei u nong India katba u dang ñiah ia ka kali, u peit artad ha ka mobile phone bad dei kane ka daw kaba la pynlong ia u ban leit tur beit-beit sha ka kali kaba wan mar pyrshah bad kaba la ñiah da utei u nonghikai katei ka skulbah, uba la ithuh kyrteng u Tan Yock Lin, uba la 70 snem ka rta.
Ia utei u nonghikai, la pynkit noh mar-mar hi sha ka jaka sumar ha katei ka por ba jia ka jingiatyngkhuh kali, hynrei u la khlad noh tang hadien katto- katne por namar ka jingmynsaw ka la jur palat.
Ki nongtohkit ki lap ruh ba u Natarajan u dei uba ju ñiah lymwir bad u bym ju da phikir ha ka laiñ ñiah kali, Namarkata, ka tnat Traffic Police jong ka Singapore, ki la bthah ia u ban aiti noh ia ka Licence jong u ha u Jylliew jong utei hi u snem 2023, hynrei katei ka jingjia ka la jia hadien 2 taiew jong kane ka jingbthah ki pulit.
Watla katta, la ong ba hadien jong katei ka jingjia, u Natarajan u dang iai bteng hi ban ñiah ia katei ka kali ha kiwei de ki jingjia hapoh jong u snem 2024, hadien ba la pynduh noh ia ka Licence jong u.
Kumta, la ong ba ki bor pyniaid ka Singapore ki la lap ia shibun tylli ki kam pynkheiñ aiñ ba la leh da utei u briew, kynthup ia katei ka jinglong thurmur jong u ha ka kam ñiah kali bad kaba la shim syndon ia ka jingim jong utei u nonghikai ha utei u snem.
Kumta, na ka liang ki bor pyniaid ka Singapore, ki la khang pyrshah ia u ban ñiah ia kano- kano ka kali hapoh jong katei ka nongbah ha baroh shyrta ka jingim jong u.
U Professor Tan, uba la shah mynsaw jur ha ki bynta jong ka khlieh, u la sahkut hapoh ka kali jong u ha katei ka por ba jia ka jingiatyngkhuh kali bad utei u nong India, ha kaba, la shim por haduh 1 kynta ban lah ban sei ia u na katei ka kali ba la julor bad kaba u la sahkut hapoh.
