Shillong, Nailar 31
Ka Khasi Students Union (KSU) Delhi Unit ka la aiti noh ïa ka samla kaba shah sumar ha AIIMS hospital Delhi sha kiba haïing hasem kiba la poi ha ka sngi U Blei.
Haba ïoh ban ïakren bad ka samla Marbiang Khongwir, kaba dei ka President ka KSU Delhi Unit ka la ïathuh ba kane ka samla kaba shitom jur, ha ka sngi U Blei ka la kyndit bynriew hynrei kam treh ban ïathuh ïa kaei kaba la jia ha jingim jong ka.
Ka la ïathuh ba kane ka samla kaba la kren lamwir da ka ktien Khasi haba ka thiah ha katei ka hospital la suba ba ka lah ban shah batbor hynrei ynda ka la kyndit bynriew mynta ka sngi kam treh ban ïathuh ïa ki jingjia baroh.
Shuh shuh ka la pyntip ba kane ka samla kam treh ban ujor sha ki pulit ïa ki jingjia baroh kumta ka KSU Delhi unit ka la aiti noh sha kiba haïing.
Ka samla Marbiang ka la pynpaw ba kane ka kynthei kam treh ban ïathuh ïa ka jaka trei, kam treh ban ïathuh ïa ka jaka sah.
Ka la pyntip ruh ba kane ka kynthei ka la shu ïathuh ba ka la kyllon.
Kum ban shu pynkynmaw ïa kane ka samla Khasi la leit buh da uwei u briew sha AIIMS hospital Delhi ha ka jingbym tip briew shuh.
Na ka liang ka KSU ka la ïoh ïa ka phone call na ki nos na Shillong bad ka doktor AIIMS hospital kiba la pyntip halor katei ka kynthei ba la mynsaw jur ba la wan buh da uwei u briew bym dei Khasi na Noida ha ka miet 29 tarik mynta u bnai Nailar.
Ha kaba ïadei bad kane, na ka liang ka seng mar mar ka la leit sha hospital ban wad jingtip bad na ka liang ki doktor ki la shu ïathuh ba ïa katei ka khynnah la wan buh da u shynrang briew bad haba ki peit ïa kane ka khynnah ruh kim lah ban tip ïa ka kyrteng namar ba kam don pla kam don phone ne kino kino ki ID.
