Shillong, Nailar 31
Hadien ka jingjop ïa ka Tajikistan ha ka taïew ba la lah, ka India kan pynkhreh ïa ka jingïakhun kaba ar pyrshah ïa ka kynhun ïalehkai kaba khlaiñ bor na Asia, ka IR Iran ha ka lah sngi U Blei ha Hisor Central Stadium kaba ha Hisor, Tajikistan ha ka por 17:30 janmiet.
U coach ka kynhun u Khalid Jamil u la ai burom ïa ka jingjop pyrshah ïa ka Tajikistan ïa ki nongïalehkai ba dei ka jingïatylli hapdeng ka kynhun hi baroh kawei. “Ka jingjop ka dei baroh namar ka jingïatylli kaba ki nongïalehkai ki la pyni ha madan. Baroh ki la ïatreilang. Ym tang ki nongïalehkai, hynrei ki nongtrei baroh,” ong u Jamil ha ka website jong ka aiff shi sngi hashwa ban sdang katei ka jingïakhun.
Ka India (kaba don ha ka kyrdan ba 133 ha ka pyrthei) kan ïakynduh pyrshah ïa ka Iran (kaba don ha ka kyrdan ba 20), te kumta ïa kane ka jingïalehkai la pynïasyriem kum u ‘David bad u Goliath’. Hynrei na ka liang u coach ka India u dangpynleit jingmut na ka bynta kane ka jingïakhun pyrshah ïa katei ka kynhun kaba khlaiñ bor.
“Ka jingjop ha ka jingïalehkai ba la dep ka la long ka jingpynshlur kaba khraw ïa ngi, hynrei kaba kongsan mynta ka long ba ngin long kiba la pynkhreh na ka bynta ka jingïalehkai pyrshah ïa ka Iran. Ngi la ïoh ar sngi ban pynkhreh ïa ka kynhun, bad mynta ngi donkam ban pynthikna ba baroh ki long ba la khreh ban ïakhun pyrshah ïa ka Iran,” ong u Jamil.
U rangïalehkai ‘dien u Sandesh Jhingan uba la thep ïa ka kol kaba ar ha ka jingïakhun pyrshah ïa ka Tajikistan da 2-1 bad u la shah jied kum u Player of the Match na ka bynta ka jingïalehkai bha ka jong u, u la ban jur ïa ka jingdonkam ban ïaleh katba lah kumba ki la lah ban pynjop pyrshah ïa ka Tajikistan.
“Kine ki jingïalehkai ki long kiba kongsan na ka bynta jong ngi ban pynkhreh ïalade na ka bynta ka Qualifier ban wan pyrshah ïa ka Singapore,” la ong u Jhingan.
