Shillong, Nailar 31
Ka North East Zone ka la ïakhun tyngeh ban ïakhaid pyrshah ïa ka Central Zone ha ka quarter final jong ka Duleep Trophy Quarter, kaba la kut ha ka sngi U Blei ha Bengaluru.
Ka Central Zone ka la ïoh ba kan kamai 532/4 bad 331/7, katba ka NE Zone ka la lah ban kamai 185 ha ka inning kaba nyngkong hashwa ba kan ïeng ïaleh pyrshah ban kynjoh sha ki 200/6 ha ka inning kaba ar. Hynrei da ka jinglah ban jop ha ka inning kaba nyngkong, ka Central ka la jam sha ka semifinal.
Kine ki lai ngut ki nongïalehkai ka Meghalaya kiba kynthup Arpit Bhatewara, Akash Kumar Choudhary bad u Aryan Borah ki la long napeng ki 15 ngut kiba la don ha kane ka thup jong ki 15 ngut ki rangïalehkai katei ka kynhun.
Hadien kane ka jinglah ban ïalehkai, kiba bun ki nongïalam jong ki synjuk ïalehkai ka thaiñ shatei lammihngi kiba la pynpaw ka jingïaroh. Kine ki kynthup ïa u Leishangthem Ronel Singh, Secretary ka Manipur Cricket Association bad u Convenor jong ka North East Zone selection committee, bad u President ka Meghalaya Cricket Association u Naba Bhattacharjee bad u Secretary ka Meghalaya Cricket Association u Bah Rayonald Kharkamni. Ki la pynpaw da kaba thoh, “Nga ai khublei kyrpang ïa ka kynhun jong ka North East Zone baroh kawei, ryngkat bad u coach bad ki nongkyrshan, na ka bynta ka jinglehkai kaba dei jong ki ha ka Duleep Trophy 2025 pyrshah ia ka kynhun jong ka Central Zone, kaba don katto katne ngut ki nongïalehkai ba paw jong ka ri bad kiba la ïalehkai shabar ri.”
Ki rangïalehkai ka Central Zone ki kynthup ïa kiba la ju mihkhmat ïa ka ri India ki long u Kuldeep Yadav bad u Deepak Chahar ryngkat u khlur ïalehkai Indian Premier League u Harsh Dubey.
