New Delhi, Nailar 31
U Myntri Rangbahduh ka India, Narendra Modi u la ïakynduh ïa u Xi Jinping, President ka People’s Republic of China, ha ka jaka ba pynlong ïa ka lympung ki nongïalam jong ka Shanghai Cooperation Organization (SCO) ha Tianjin ha ka 31 tarik u Nailar, 2025.
Baroh arngut ki nongïalam ki la pdiang ïa ka jingïaid lynti kaba bha bad ka jingïaid shaph-rang kaba sted ha ka jingïadei hapdeng ki artylli ki ri naduh ka jingïakynduh ba khatduh jong ki ha Kazan ha u bnai Risaw, 2024.
Ki la pynskhem biang ba ki artylli ki ri ki dei ki paralok ha ka roi ka par ym ki nongïaleh pyrshah, bad ba ki jingïapher jingmut jong ki kim dei ban kylla long ki jingïakynad.
Ka jingïadei bad jingïatreilang kaba skhem hapdeng ka India bad ka China bad ki 2.8 ‘billion’ ngut ki briew jong ki ha ka nongrim jong ka jingburom mar-kylliang, ka jingsngewtynnad markylliang bad ka jingsngewrit markylliang ka long kaba donkam na ka bynta ka roi ka par bad ka jingkiew shaphrang jong ki ar tylli ki ri, kumjuh na ka bynta ka pyrthei bad ka Asia kaba ïarap ïa ki jinglong jong ki spah snem kaba 21.
U Myntri Rangbahduh u la kdew sha ka jingdonkam jong ka jingïasuk ha ki jaka khappud na ka bynta ban bteng ban kyntiew ïa ka jingïadei hapdeng ki artylli ki ri. Ki arngut ki nongïalam ki la kdew da ka jingsngewkmen ïa ka jingpynkut ïa ka jingïatyngkhuh ha u snem ba la dep bad ka jingpynneh ïa ka jingïasuk ha ki jaka khappud naduh kata ka por.
Ki la pynpaw ïa ka jingkular na ka bynta ka jingpynbeit kaba hok, kaba don jingmut, bad kaba lah ban pdiang lang ïa u pud u sam kaba mih na ka jingpeit jong ka kam saiñ pyrthei bad ka jingïadei jong ki bad ki jingmyntoi ba neh jong ki ar liang ki jaidbynriew. Ki la ithuh ïa ki rai kiba kongsan ba la shim da ki arngut ki Special Representative ha ki jingïakren jong ki ha kaba sdang ha une u bnai, bad ki la mynjur ban kyrshan shuh-shuh ïa ki jingpyrshang jong ki.
Kine ki arngut ki nongïalam ki la kdew ïa ka jingdonkam ban pynkhlaiñ ïa ka jingïadei para briew lyngba ki jingpynher liengsuiñ kiba ïaid-beit ïaid-ryntih bad ka jingpynsuk ban ïoh ïa ki ‘Visa’, da kaba tei halor ka jingsdang biang ïa ka ‘Kailash Manasarovar Yatra’ bad ki visa na ka bynta ki nongjngoh kai.
Halor ka jingïadei ha ka ïoh ka kot bad ka khaïi-pateng, ki la ithuh ïa ka bynta jong ki artylli ki ri jong ki ban pynskhem ïa ka khaïi-pateng ha ka pyrthei. Ki la pynpaw ïa ka jingdonkam ban ïaid shakhmat na ka liang ka kam saiñ pyrthei bad ka lynti treikam ban pynïar ïa ka jingïadei ha ka khaïi-pateng bad ka jingbei tyngka hapdeng ki arliang mamla bad ban pynbeit ïa ka jingduna ha ka khaïi-pateng.
U Myntri Rangbahduh u la kdew ba ka India bad ka China baroh ar ki bud ïa ka jingsynshar shimet, bad ïa ka jingïadei jong ki ym dei ban peit lyngba ka jingpeit jong kiwei-kiwei ki ri. Ki arngut ki nongïalam ki la pdiang ba ka long kaba donkam ban pynïar ïa ka jingïasngewthuh jingmut halor ki mat bad ki jingeh jong ki arliang mamla, ka thaiñ, bad ka pyrthei, kum ki kam lehnoh bad ka khaïi-pateng kaba hok ha ki rynsan ba bun jait.
Shuh shuh Myntri Rangbahduh u la pynpaw ka jingkyrshan ïa ka jinglong President jong ka China ïa ka SCO bad ka ‘Summit’ ha Tianjin. U la khot ruh ïa u President Xi sha ka BRICS Summit kaba ka India kan pynlong ha u snem 2026.
Na ka liang u President Xi u la ai khublei ïa u Myntri Rangbahduh ka ri halor kane ka jingkhot bad tyrwa ruh ïa ka jingkyrshan jong ka China ïa ka BRICS Presidency jong ka India.
U Myntri Rangbahduh u la ïakynduh ruh bad u Cai Qi uba dei u dkhot ka Standing Committee jong ka Politburo ka Seng Komunist jong ka China.
U Myntri Rangbahduh u la batai ïa u Cai shaphang ka jingthmu jong u na ka bynta ka jingïadei hapdeng ki arliang mamla bad u la pan ïa ka jingkyrshan na u ban pynurlong ïa ka jingthmu jong ki arngut ki nongïalam. U Cai u la pynpaw biang ïa ka jingkwah jong ka China ban pynïar ïa ka jingïakren hapdeng ki arliang mamla bad ban pynbha shuh-shuh ïa ka jingïadei katkum ka jingïasngewthuh jingmut kaba la mynjur lang hapdeng ki arngut ki nongïalam.
