Shillong, Nailar 31
Hadien ka jingpynbna u Myntri Rangbah ka Jylla u Conrad K Sangma ba naduh u bnai Naiwieng ka Sorkar Jylla kan siew hi noh ïa ka tulop ki nongtrei jong ki District Council, na ka liang u Bah Charles Pyngrope, u MLA ka Nongthymmai Constituency u la ai ka jingkyrshan halor kane.
Haba kren sha ki lad pathai khubor ha ka nohphai sngi ka 30 tarik U Nailar 2025 u bah Charles Pyngrope u la ong ba ka long kaba bha palat lada ka sorkar kan siew hi noh ïa ka tulop ki District Council.
U la ong ba la katta phew snem ki nongtrei jong ki District Council kim shem la ïoh shuh ïa ka tulop jong ki bad ka jingeh jong ki nongtrei kadon beit namar ba ka tulop kim pat ïoh bad kin bsa da kaei pat ïa ka ïing ka sem.
“Ka jingpynbna ka Sorkar ban siew hi noh ïa ka tulop sha ki nongtrei District Council ka bha palat” la ong u Bah Charles.
Shuh shuh u la ong ruh ba ki don ki briew kiba la kynnoh ba kane ka jingleh ka sorkar ban siew hi noh ïa ki nongtrei ki District Council dei ka jingleh politik hynrei u ong nai ïakheiñ ïa kita kiei kiei baroh khnang ba kin ïoh ïa ka tulop namar ki la shu kit da ka ram.
U la ong ba kane ka jingpyrkhat ka sorkar ban siew hi noh ïa ka tulop sha ki District Council ka la dei ban leh naduh mynshwa hynrei mynta pat ba ka lah wan ka la biang shibun eh.
