Shillong, Nailar 31
U nongaiktien ba rangbah ka BJP, Bah M. Kharkrang u la ong ba ka bynta ba ïadei bad ka niam kaba ki seng ba pyrshah ki ju mlien ban pyndonkam, ka dei ka mat kaba ïakynduh jingeh bha haba ka BJP ka pyrshang ban pynïar ïalade ban ïoh jingshaniah ha kane ka Jylla.
Haba kren sha ki lad pathai khubor hadien ka jingïalang jong ka seng ha ka Sngi Saitjaiñ, u Bah Kharkrang u la ong ba la ïakren ïa kane ka mat halor kumno ka seng ka lah ban ïakhun pyrshah ïa kane ka bynta.
“Na kaei kaba nga ïohi, tang kawei ka jingeh ïa ka BJP ha Meghalaya ka long tang kata – ka dei ka bynta ba ïadei bad ka niam kaba la pyndonkam da baroh ki seng saiñ pyrthei, kiba pyrshah ïa ka seng,” u la ong haba bynrap “Lada ki briew ki peit shabar jong kane ka bynta, ka seng kan sa lah ban thaw ïa ka nongrim kaba skhem.”
Ha kane ka jingïalang ba kongsan jong ka seng, ki ‘riew shemphang bad ki nongkren na Delhi ki la ïamir jingmut halor ka buit ban pynroi ïa ka seng ha ki bynta jong ki shnong ki thaw bad ka jingpynbeit ryntih ha ki ‘Booth-Level’.
Katkum ka jingong u Bah Kharkrang, ka jingïalang ka la ban jur ïa ka jingangnud jong ka seng ban kyntiew ïa ka ri India naduh tynrai, kaba ïadei dur bad ïahap bad ka thong jong u Myntri Rangbahduh ka ri.
Haba ïadei bad ka ilekshon ban wan sha ka GHADC, u Bah Kharkrang u la pynshai ba ym shym la ïakren eiei halor kane ha ka jingïalang.
Halor ka jingkam kwah burom jong ka NPP na ka bynta ki skhim ka Sorkar Pdeng, u la ong ba ka jingthmu jong ka seng ka long ban pyntikna ba ki nongïoh jingmyntoi kiba dei hok kin ïoh ïa ki jingmyntoi, khlem da kheiñ mano ba ïoh ïa ka burom.
“Ngim sngew eiei halor kata ka jingkwah burom; ka jingthmu ba kongsan jong ngi ka long ban pyntikna ba ki skhim kin poi sha ki briew kiba dei hok ban ïoh ïa ki,” la bynrap u Bah Kharkrang.
Katkum ka jingong jong u, ka BJP ka angnud ban bteng ha ka ban pyntreikam ïa ki skhim pynroi na ka bynta ka jingmyntoi jong ki paidbah ka Jylla.
