Shillong, Nailar 31
Ha ka step phyrngap jong ka 31 tarik u Nailar 2025, kawei ka kali Maruti Van kaba don ïa u Registration Number ML 05-V-9756 kynsan kynsan ka la kem ding.
Ha katei ka jingkem ding kynsan, katei ka kali Maruti Van ka la ingkhong lut khait na ka jingbam duh jong ki thylliej ding.
Katkum ka jingïathuh jong u General Secretary ka Shnong Pyndengumïong u Bah Lambok Nongrang ba kane ka jingjia ka dei ha ka por kumba 3 baje mynstep ha ka jaka pynïeng kali ha khmat Tirot Sing Memorial Hall jong ka shnong.
Ia katei ka jingjia la sakhi da ki arngut ki briew kiba thiah miet hapoh kawei ka kali ha ka jaka ïeng kali jong ka hall, hadien ba ki la ïohi ïa ka jingkem ding kynsan katei ka kali Maruti Van mar mar ki la pyntip noh sha ki nongïalam jong ka shnong.
Hadien kata na ka liang ki nongïalam shnong ki la pyntip noh mar mar sha ka Fire Service Station, kiba ha ka por kaba biang ki la wan poi bad la lah ban tem noh ïa katei ka ding ba klang.
La ïathuh ruh ba ka don sa kawei pat ka kali kaba ïeng hajan bad katei ka Maruti Van kaba ka la shah ktah malu mala na ka bumper bad headlight na ka jingkloi ban pynkynriah noh ïa ka. Kumta katei ka ding kam shym la saphriang shuh.
La ong ba ka jingjia jong kane ka jingkem ding katei ka kali ym pat lah ban tip shai ïa ka daw tynrai, ba na kaei kadaw ba katei ka kali ka sa kem ding kynsan.
