Jowai, Nailar 31
Ka Behdeinkhlam kaba shisien shisnem jong ka Seinraij Mukhla bad kaba khatduh eh ban pyndep na baroh ki Raid ha Rilum Jaiñtia, kala poi sha kaba kut ha aitnar hapdeng ka jingiphuh iphieng ha ka 31 tarik Nailar.
Mynta ka kynti, kane ka Behdeinkhlam kan long kaba sah kynmaw namar ba u Myntri Khynnah ka tnat Ministry of Development of North Eastern Region u Dr. Sukanta Majumdar, ula ïasoh lang kum u kongsan ha kane ka jingrakhe lyngba ka video conference bad plie paidbah ïa ki 6 tylli ki jingtei ne cultural infrastructure project ba shongdor T1.93 klur ha East Jaiñtia Hills bad West Jaiñtia Hills.
U Majumdar u la ban jur ïa ka jingangnud jong ka Sorkar ban pynneh pynsah ïa ki kolshor bad riti dustur ryngkat da kaba kyntiew ïa ka roi ka par kaba kynthup lang ïa baroh.
Kine ki 6 tylli ki projek, kiba la bei pisa da ka North Eastern Council, ki long na ka bynta Seinraij-Tuber, Ialong, Mukhla, Muthlong, Kongwasan Chyrmang, bad Sohkymphor.
Ki kynrem ki lyndan kiba wan sakhi ïa kane ka Behdeinkhlam ki kynthup ïa u Symbud Myntri Rangbah Bah Sniawbhalang Dhar kum u symbud kongsan ryngkat u Myntri Sorkar Bah Kyrmen Shylla, u nongaibuit ka Sorkar bad MLA u Bah Lahkmen Rymbui bad kiwei kiwei ki MLA ba kynthup ka Kong Santa Mary Shylla, Damanbait Lamare, bad Wailadmiki Shylla.
La ïadon lang ruh u nongtrei kam bhalang ne social worker u Sunil V Deodhar, NEC Secretary S.K. Bhalla, president Ki seinraij Jaiñtia Ma Phrangki Pale nalor kiwei kiwei.
Ha kane ka sngi la pyllait paidbah ruh ïa ka Vision Document 2028 ba la pynkhreh da Ki Raij Jaiñtia.
La pynkut ïa ka Behdeinkhlam da ka jingwan poi ki 14 tylli ki rong ha Aitnar.
