Shillong, Nailar 31
Ka Mawkriah West SC ka la long la lahduh ha ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA), hadien ba la lah ban pynliem noh ïa ka Umlyngka SC da 3-0 kol ha ka sngi Saitjaiñ.
Kane ka nam jop ka la wan urlong lyngba u Honour Lucky Nongbri (18), Hostarfield Khar-budnah (47) bad u Insporjoy Rynjah (89).
Baroh ar kine ki kynhun ki la ïoh rung sha ka Second Division 2026 hadien ba ki la jam sha ka final hashwa ba kin ïaknieh ban rah ïa ka nam lahduh.
Ha kane ka jingïakhun final la wan sakhi da ki paidbah na ka bynta ban ai jingkyrshan ïa la ki jong ki kynhun. Watla ka Umlyngka ka don bun ki nongkyrshan ban ïa ka Mawkriah West. Hynrei kitei ki nongkyrshan ka Umlyngka ki la hap ban sngap jar hadien ba u Honor Lucky u la ïoh ban pynkhih jar nyngkong tang hapoh 20 minit.
Ka Umlyngka kam shym la lah satia ban thep kol ha ki saw tylli ki jingïakhun ba la dep, hynrei ka la lah ban khur jingjop ha ka quarter bad semi final lyngba ka tie-breaker. Kumjuh ha kane ka jingïakhun ruh ka la shem jingeh ban thep kol ha ka sien kaba san.
U Samborlang Nong-bsap u la ïoh ïa ki kabu biang biang ha ka kylla step, ha kaba u rangapkol ka Mawkriah West, u Sunshine Kharmuti u la lah ban khanglad na ka jingshah thep bad hadien ïa u rangïalehkai ‘dien u Ebenezer Mawkhiew.
Ka Umlyngka ka dangdon ka jingkyrmen ban ïoh thep kol ha ka kylla miet, hynrei ka la shah thep biang sa shi kol ha u Hostarfield, kaba long ka sien kaba nyngkong eh ïa u ban thep kol ha kane ka aïom.
U Samborlang u la ïai bteng ban ïakhun tyngeh, hynrei um shym la lah ban thep kol ïa ka Umlyngka. Hapdeng kine ki jingpyrshang ki rangïalehkai bha ki rangïalehkai ka Umlyngka, hynrei kim shym la lah ban pynurlong na ka daw ka jingtbit u Sunshine, uba la lah ban pyllait na ka jingshah thep.
Hapdeng kane ka jingpyrshang, ka Umlyngka ka la ïoh ïa ka kabu kaba biang ban pynphai, hynrei na ka liang u ‘assistant referee’ u la kyntait namar ba ka dei ka offside. Hadien kane ka Umlyngka ka la ïai bteng ban thom naphang, hynrei ka Mawkriah West ka la lah ban ïada ban pyllait na ka jingshah thep.
Ka kol kab khatduh ba la thep da ka Mawkriah West ka la wan urlong lyngba u Insporjoy ha kaba u rangapkol ka Umlyngka u Berith Nongbri um shym la lah ban pyllait na kane ka jingshah thep bad ban pynlong shi syndon ban khur ïa ka jingjop.
Ïa kane ka lympung ïalehkai Third Division la ju kyrshan manla u snem da ka Shillong Recreation Ground Trust. Te kumta ki nongïalam ka SRGT kiba kynthup ïa u bah Wallam-phang Roy bad u Bah Danny M Pariat lem bad u President ka Meghalaya Football Association (MFA) u Bah Hamletson Dohling ki la don ha katei ka sngi ryngkat bad ki dkhot ka SSA.
Te kumta ka Maw-kriah West kum ka lahduh, ka la ïohpdiang ïa ka khusnam pisa kaba T. 80,000, katba ka Umlyngka la ka ïoh T. 40,000. U Sunshine u la ïohpdiang ïa ka nam Player of the Final, katba uWanborlang Lyngdoh Nongbri na ka Umrynjah u la ïohpdiang ïa ka nam Top Scorer, da kaba u la lah ban thep 7 kol.
Ka Shillong Premier League kan bteng biang ha ka lah sngi U Blei hapdeng ka Rangdajied United pyrshah ïa ka Nongrim Hills ha ka por 4:30 nohphai sngi.
