Nongpoh, Nailar 31
Kumba ju long manla u snem, ka National People’s Party (NPP) Jirang Block ha ryngkat bad u MLA ka thaiñ, u Bah Sosthenes Sohtun ha ka sngi Saitjaiñ, ki la pynlong ïaka prokram kaba kyrpang ha St. Francis Asisi Hall jong ka skul Don Bosco Higher Secondary School, Byrnihat ban pynkup burom ïa ki khynnah pule kiba wan shakhmat lane ki topper kiba la pyndep ïaka eksamin Secondary School Leaving Certifi-cate (SSLC), 2025 kiba hap hapoh jong ka Umling C&RD Block.
Nalor ka jingpynkup burom ïa kitei ki samla pule jong ki skul ki bapher bapher, ka NPP Jirang Block, kala pynkup burom lang ruh ïa ki Principal jong kitei ki skul halor u synñiang u bynhei, ka jingtrei shitom bad lenlade ka jong ki ban ai ïaka jingnang jingstad kaba paka sha ki khun samla ka thaiñ. Ha kane ka sngi la pynkup burom ruh ïaka Kong Wanmontimai Marbaniang, kaba dei ka President ba thymmai jong ka National People’s Women Front (NPWF) ka Ri Bhoi District.
Ha kane ka sngi, la wan ban ïadon bynta da u Rupert Momin, Chairman jong ka Meghalaya New and Renewable Energy Development Agency kum u kongsan, u Bah Savio Blah, District School Education Officer (DSEO) ka Ri Bhoi kum u symbud kongsan, nalor ki nongïalam ka Byrnihat Parish, ki Principal, nonghikai bad samla pule jong ki skul bapher bapher ka thaiñ.
U Rupert Momin haba ai jingkren kum u kongsan ha kane ka sngi, u la ong ba ka jingtrei shitom kadei kawei na ki bynta ba kongsan eh ban poi sha kano kano ka thong kaba thmu, naba khlem ka jingtrei shitom hi, yn nym lah satia ban kiew shaphrang ha ka jingim da kaba ai nuksa ïa u MLA ka Jirang, u Bah Sosthenes Sohtun ba dei lyngba ka jingtrei shitom ka jong u, ba u lah ban kynjoh haduh kane ka kyrdan nongmihkhmat kumba u long mynta.
U Rupert Momin u la ong,”Ka jingnang jingstad kadei ka bor kaba khraw tam ha ka pyrthei bad lyngba jong ka, ngi lah ban leh ïa shibun kiei kiei ha ka jingim bad na ka bynta ka imlang ka sahlang. U la ai nuksa ruh ba ki ri ba khlaiñ bor ha ka pyrthei kidei ki ri kiba la kiew shaphrang ha ka jingnang jingstad bad lada ma ngi ruh, ngi trei shitom bad minot thop ha ki jingpule, khlem pep ngin lah ban long kumba long lem kiwei ki ri ba khlaiñ bor ha ka pyrthei bad ngin kiew shaphrang ruh ha ka ïoh ka kot.”
Haba kren ha kane ka sngi, u Bah Sosthenes Sohtun u la ïathuh ba ïa kane ka prokram ban pynkup burom ïa ki samla kiba pass bha ha ka eksamin matrik, la ju pynlong manla u snem naduh ka jingjop ka jong u kum u MLA ha u snem 2018 ter ter haduh mynta, kum shi bynta ban pynshlur bad ai mynsiem ïa ki khun samla ka thaiñ ba ki dang lah ban minot bad trei shitom shuh ha ki kyrdan pule kiba kham shalor ki jong ki.
U Bah Sosthenes Sohtun ula pyntip ruh ba kum u nongmihkhmat u da thrang eh ba ki khun samla ka thaiñ ki ïoh rung ha ka thup jong ki Top 20 jong ka resol SSLC, bad pynpaw ba watla mynta u snem ym shym la don satia kiba ïoh rung ha katei ka thup, hynrei u don ka jingkyrmen ba ha ki snem kiban sa wan, kin sa mih ki samla kiban poi sha katei ka thong bad ïathuh ba na ka liang ka jong u, u la pynkhreh ban ai ïa ki khusnam ba kyrpang sha ki khun samla kiba trei shitom bad minot thop kiba lah ban kynjoh sha katei ka thong.
Ha kane ka sngi, la pynshongshit bad pyniphuh iphieng shuh shuh ïaka prokram lyngba ki jingrwai bad ki jingshad jong ki samla pule na ki skul bapher bapher jong ka thaiñ, kiba la wan ban ïashim bynta shitrhem ha ryngkat ki riam tynrai jong ki jaidbynriew bapher bapher ka ri.
