Nongstoiñ, Nailar 30
Ar ngut ki rangbah Khasi na ka shnong Mawdiang-snam jong ka thaiñ Langpih ki la mynsaw halor ka jingkynnoh ba ki la shah shoh ha u Officer In-charge ka Assam Border Police Out-post kaba don ha Langpih.
Kitei ki ar ngut ki rangbah kiba la shah shoh ki kynthup ïa u Bah Welphus Swangre bad u Bah Josaia Swangre na ka Shnong Mawdiang-snam bad katkum ka jingïathuh jong u Bah Josaia, katei ka jingjia kala jia ha ka janmiet jong ka sngi Thohdieng ha ki por kumba 5 baje eiei.
Haba batai bniah halor katei ka jingjia, u Bah Josaia Swangre u la ong ba katei ka jingjia kala jia ha kawei na ki bynta jong ka ïew Assam kaba don ha Langpih ha kaba ma u katba u dang thmu ban leit phai noh sha la shnong hynrei uwei u briew na ki jaidbynriew Rabha uba ïadon lang bad kiwei pat u la shu wan bad u la kura ïa u na ki bynta jong ka kpoh.
Shuh shuh u Bah Josaia u la ong ruh ba hadien ba ma u, u la pyrshang ban kylli balei ba shoh khlem kano kano ka daw, hynrei khlem sngap u la shoh biang bad hapdeng ka jingïa ksaid, la wan lap sa uwei pat u para shnong jong u, u Bah Welphus Swangre ban wan ïarap lang ïa u hynrei ha katei ka por utei u Rabha u la pyntip noh sha u pulit ka Assam Border Police Out-post kaba don ha Langpih bad mar ïa wan poi utei u pulit u la shoh pynban ïa u khlem da kylli ïa ka daw bad hadien kane la rah noh ïa u bad ïa u Bah Welphus sha BOP jong ka Assam ha Langpih ha kaba utei u pulit uba dei u In-charge ka Assam u la shoh ruh ïa u Bah Welphus.
U la ïathuh ruh ba utei u IC ka Assam mar ïa dep shoh, la sei noh ïa ki napoh thanad shabar bad hadien kane katba ki dang thmu ban mih noh na katei ka jaka ban leit phai noh sha la shnong hapdeng ka jingmynsaw, la kynduh biang sa ïa uwei pat u para shnong uba wan da ka arshaka bad kumta ki la ïa shong lang noh da kata ka arshaka.
Shuh shuh u la ong ruh ba katba ki dang ïa leit phai, ki la don ki bahaïing kiba la phone ïa ki ba kin ap, ha kaba ki pulit ka Meghalaya kiba don ha Langpih kin wan shaw bad na ka liang ki pulit ka Meghalaya ruh mar ïa wan poi, ki la pynkit noh ïa ki bad ki la leit buh haduh PHC Nonglang ban phah sumar, katba ïa u Bah Josaia uba la kham mynsaw la pynkit noh sha CHC Nongstoiñ ban phah sumar.
Halor kane ka jingjia, ki nongïalam jong ki ar tylli ki seng ka thaiñ Ri Mulliang ba kynthup ïa ka HYC Ri Mulliang Circle ha ka jingïalam u samla Distarborlin Wanniang ha ka jingdonlang u samla Lumlang Kharsyiemlieh, President ka HYC WKH bad ka FKJGP Ri Mulliang ha ka jingïalam u Bah Serbilin Lyngdoh, President ha ka jingdonlang u Bah Pynshai Kharbani, President FKJGP WKH mar ïa ïoh jingtip ha ka sngi Saitjaiñ ki la leit mar mar sha Civil Hospital Nongstoiñ ban ïakynduh ïa utei rangbah uba la mynsaw bad ïa ki bahaïing hasem, da kaba ki la pynpaw ïa ka jingpynrem kaba jur ïa katei ka jingleh jong u IC ka BOP ka Assam ha Langpih.
U samla Distarborlin Wanniang u la ong ba ka long kaei kaei kaba sngewsih namar kam dei shuh ka sien kaba nyngkong, kum kine ki jingleh jong u IC ka Assam bad katkum ka jingïathuh jong kiba shah shoh ka long ba khlem kino kino ki daw, khlem kylli byrthew hynrei la shoh la ka shoh.
“Na ka liang ka seng ka pynpaw ïa ka jingpynrem bad ka sngew ban ong ba une u IC ka Assam u ai nong ïa ki ‘Gunda’ briew na kato ka jaka ban phah shoh ïa ki briew ki jong ngi haba ki ïaid ha ki lynti ki syngkien bad kane ka jingleh ka jong u ka paw ba kum u briew jong ka aiñ lada u leh ha kane ka rukom ka long u pynsniew ïa ki para nongshong shnong ha ki thaiñ khappud bad kiwei pat ki jaidbynriew kiba shong ha katei ka thaiñ,” ong u samla Distarborlin da kaba bynrap ba kane ka long kaei kaei kaba ym lah ban pdiang.
U samla Distarborlin u ong ruh ba ka seng ka wer ïa ki paradoh parasnam ba kin long kiba ïatylli lang lada ka long kumno kumno ruh.
Ka seng ka kyntu ruh ïa ka tnat Pulit ka Jylla ba kin shimkhia lem ban peitngor halor ka jingshah bom shah shoh kumba ki ju ïarap ïa kiwei pat ki jingeh.
U Bah Serbilin, President ka FKJGP Ri Mulliang u la ong ba ka seng ka dap da ka jingsngewkhia ban ïohi ïa ka jingleh jong u IC ka Assam ha Langpih.
“Ngi da sngewsih ba kat briew jong ka aiñ un shu shoh un shu bom ïa ki nongshong shnong ha kato ka dur,” ong u Bah Serbilin bad bynrap “Ngim lah ban ong kiei ki daw ba u shoh u bom ïa ki hynrei ka rukom shoh ka rukom bom ka jong u kala long palat bad ka bym ïadei shuh katkum ka hok long briew man briew”.
Shuh shuh u la ong ruh ba katei ka jingleh ka jong u ka long kaei kaei kaba kum ka seng, ki paidbah jong ka thaiñ ki sngew ban pyrshah jur bad pynrem jur.
Ka seng ka buh ka jingdawa bad ka jingmaham lada kum kine ki jingjia kin ïai bteng, ka seng hi ha kawei ka por kan nym lah shah bad kan poi ha ka jingïasniew bad ka seng ka kyntu ruh ïa ka Sorkar Jylla lyngba ka tnat Pulit ba kan shimkhia ïa kane ka mat, ong u Bah Serbilin.
