Shillong, Nailar 31
Ka College of Teacher Education (PGT) Shillong, ka la pynlong ïa ka jingïalang pynkup burom ha ka 30 tarik Nailar, 2025, ban pynkup burom ïa ki samla pule jong ka kiba la leh bha ha ka B.Ed. Eksamin 2025 bad ruh kiba la ïoh ïa ka jingithuh kum ki nonghikai ba tbit ha kane kajuh ka eksamin.
Ha kane ka sngi pynkup burom la don ryngkat da u Bah Shakliar Warjri, Myntri ka Sorkar kum u kongsan bad haba ai jingkren, u la kren halor ki jingeh ba ki briew ki ïakynduh ha ka jingim bad kumjuh ruh ïa ki jingeh ba ki nonghikai ki ïakynduh ha ka kam hikai, da kaba ban jur ïa ka jingdonkam jong ka jingïaishah bad ka jingaiti lut jong ki nonghikai ha la ki kam hikai.
U Myntri u la ai burom ïa la ka jong ka jong ka jingjop jong u ha ka jingim ïa U Blei, ki kmie ki kpa bad ki nonghikai jong u, da kaba pynpaw ïa ka bynta kaba kongsan kaba ki nonghikai ki leh ha kaba pynwan dur ïa ka jingim jong ki khynnah. U la pynkut da kaba kitbok kitrwiang ïa ki samla pule ba kin ïoh ïa ka lawei kaba phyrnai bad kaba jop, da kaba ai mynsiem ïa ki ba kin ïaleh ban long kiba tbit ha baroh ki kam jong ki.
U Bah Shakliar Warjri u la kular ban ai jingïarap ban pynkhlaiñ ïa ki lad jingïalehkai ha ka College, da kaba pyrkhat kyrpang ïa ka jingpynbha ïa ka jaka ïalehkai kilan met kaba la don lypa ha ka College of Teacher Education (PGT) Shillong. Kane ka jingkular ka pyni ïa ka jingpyrshang jong ka Sorkar ban shim ïa ki sienjam ban kyntiew ïa ka jingroi jingpar kaba pura hapdeng ki samla pule bad ki nonghikai kumjuh lyngba ki jinglehkai bapher.
Ka Dr. B. Tron, Principal ka College ha ka jingkren jong ka, ka la ai khublei kyrpang ïa ki samla pule kiba la pass bha ha ka eksamin B.Ed. 2025 bad kumjuh ïa ki nonghikai halor ka jinglah jong ki ban long ka nuksa ïa ki khynnah ba pule ha ka College. Ka Principal ka la buh ruh ïa ka jingkyrpad ha u Myntri ban ai jingkyrshan na ka tnat ïalehkai ban pynkhlaiñ ïa ki jaka ïalehkai ha ka College.
Ïa kane ka jingïalang la pynphuh bad pynsngewtynnad da ki jingrwai, ki jingshad, bad ka prokram kolshor da ki samla pule ba mynta jong ka kolej, ryngkat bad ka jingpynkup burom ba kyrpang ïa ki san ngut ki nonghikai ba tbit bad hynriew ngut ki nongïoh kyrdan ha ka eksamin B.Ed. 2025, kaba la pynlong ban ithuh kyrpang ïa ka jingtrei shitom, ka jingaiti, bad ka jingtbit jong kine ki samla ha ka jingpule jong ki.
