Jowai, Nailar 31
Ka District Legal Services Authority (DLSA), West Jaiñtia Hills District kala pynlong ïa ka Legal Literacy Class halor ka Protection of Children from Sexual Offences (POCSO) Act, 2012 ha Jawahar Navodaya Vidyalaya (JNV), Mukhla ha ka 28 trik Nailar.
Ka thong jong kane ka prokram ka long ban pynsngewthuh ïa ki khynnah skul shaphang ki hok ki khynnah, ka jingshah sumar bad ki lad ai jingsumar da ka aiñ.
Ka Kong D. G. Kharshiing, Secretary, DLSA, West Jaiñtia Hills District kaba long kum ka riew shemphang kala batai bniah halor ka POCSO Act.
Ka la kyntu ruh ïa ki khynnah skul ba kin kham don ka mynsiem ban ïeng pyrshah ïa kino kino ki jait jingleh be-aiñ bad ka la pynpaw ruh ïa ka jingdon jong ki lad ai jingshakri khlem donkam siew pisa lyngba ka DLSA.
Kala don ruh ka jingïaphylliew jingmut bad ki khynnah skul, kiba la ai jingkylli bad ban ïashim bynta da kaba pynpaw ïa ki jingmut jingpyrkhat jong ki.
Kane ka jinghikai kala pynlong ïa ki khynnah ba kin kham sngewthuh bniah halor ka POCSO Act bad ka bynta jong ki kum ki briew kiba don ka jingkitkhlieh ha kaba tei ïa ka imlang sahlang kaba kham shngaiñ.
