Shillong, Nailar 31
Ka India ka la mad ïa ka jingshah rem kaba tang shisien ha ka jingïalehkai ba khatduh jong ka SAFF U17 Women’s Championship 2025, ha kaba ka la shah rem noh da 3-4 kol ha ka Bangladesh ha ka sngi U Blei ha Changlimithang Stadium, Bhutan.
Watla ka la mad ïa ka jingshah rem, ka India ka la long ka lahduh hadien ba ka la lah ban khur bun poiñ ha kane ka jingïakhun da kaba jop san sien bad shah rem shisien.
Ha kane ka jingïakhun, ki ar ngut ki ‘thei ïalehkai ka Jylla kata ka Bonifilia Shullai bad ka Alisha Lyngdoh ki la ïoh ban mihkhmat ïa kane ka kynhun naduh kaba sdang haduh kaba kut jong kane ka lympung.
Tang mar ïasdang ka jingïalehkai ka Bangladesh ka la pynkhih jar nyngkong lymgba ka Purnima Marma (1′). Hadien phra minit ka India ka la pyniakhaid kylla lyngba ka Anushka Kumari (9′). Hadien shiteng kynta ka Bangladesh ka la pynbud ïa ka kol kaba ar lyngba ka Purnima Marma (34′) na ka bynta ban tam da 2-1 kol haduh kaba kut jong ka kylla step.
Hadien saw minit ba la bteng ïa ka jingïakhun jong ka kylla miet ka Bangladesh ka la thep biang ïa ka kol kaba lai lymgba ka Sauravi Akanda Prity (49′). Hadien katto katne por ka India ka la lah ban pynïakhaid kylla ar kol lyngba ka Pritika Barman (65′) bad ka Julan Nongmaithem (89′) hashwa ba ka Sauravi (90 +5′) kan thep ïa ka kol kab khatduh na ka bynta ban pynlong ïa ka Bangladesh ban khur syndon ïa ka jingjop.
Te kumta kane ka kynhun kan hap ban wanphai shwa sha la ïing na ka bynta ban pynkhreh ïa ka jingkilanmet ha Bengaluru ban pynkhreh ïa ka AFC U17 Women’s Asian Cup Qualifiers ka abn long ha risaw ha Bishkek, Kyrgyz Republic.
