Jowai, Nailar 31
Shi bynta ban rakhe ïa ka National Sports Day na ka bynta ban kynmaw burom ïa ka sngi kha u Major Dhyan Chand uba long u khlur ïalehkai Hockey jong ka ri India, ka shlem treikam jong u Deputy Commissioner bad District Sports Officer, West Jaiñtia Hills, ha ka 29 bad 30 tarik u Nailar ki la pynlong ïa ki jingïalehkai ba kyrpang kynthup ki jingïalehkai tynrai ban pynsngewtynnad ïa ki khynnah.
Ha ka 29 tarik la pynlong ïa ki jingïakop ïalehkai tynrai na ka bynta ki skul kum ka jingïatan tyllai (Tug of War) bad Dat Moo Point, pynbud sa ka jingïalehkai phutbol paralok.
Ki la don hynriew tylli ki skul kiba la ïashim bynta kynthup ka Marian Hills Higher Secondary School, Q.C. Springside HSS, KJP Higher Secon-dary School, RC Eve Secondary School, Kiang Nangbah Government HSS, Tome Memorial HSS, HK Singh Higher Secondary School bad Jaiñtia HSS.
Ha ka jingïakop Dat Moo Point, ka RC Eve Secondary School ka la jop ha baroh ar ki kyrdan jong ki shynrang bad kynthei, ba ar ka Tome Memo -rial Higher Secondary School ha ka liang ki shynrang bad kynthei bad balai ka Q.C. Springside Higher Secondary School ha ka liang ki shynrang bad kynthei.
Ha ka jingïakop tan tyllai, ka KJP Higher Secondary School ka la rah nam jop ha ka liang ki shynrang, katba ka Marian Hills Higher Secondary School ka la jop ha ki liang ki kynthei. Ka Jaiñtia Higher Secondary School bad Kiang Nangbah Government Higher Secondary School ki la wan ba-ar, katba ka Tome Memorial Higher Secondary School ka la wan ha ka kyrdan balai ha baroh ar kyrdan.
La sam ïa ki khusnam sha ki nongjop da u kongsan u Marsoo Kyndait, uba dei rangïalehkai uba la khur khur ïa ka khur takma ksiar ha ka Northeast Olympic Games bad ha ka East Zone Junior National Championship.
Katba ha ka sngi pynkut la pynlong ïa ka jingïalehkai Badminton, ha Kiang Nangbah Indoor Sports Complex ha kaba u Mebanker Shullai uwei na ki rangïalehkai badminton ka District ula long kum u kongsan.
La pynlong ruh ïa ka Children Sports for Grass-root ha madan Kiang Nangbah Stadium bad Cycle Rally kaba sdang na Kiang Nangbah Stadium shaduh Tlumuwi.
Ïa ka Children Sports For Grass-root la pynïaid da ki Football Coach jong ka WJDSA kiba kynthup u Milan Lynrah, Dawanohi Shullai, Hopingstone Suting bad u Amity Tongper.a katei ka sngi la donlang ruh u bah Khroobok Passah, DSO ka West Jaiñtia Hills, uba la pynshlur bad ai mynsiem ïa ki khynnah halor ka thong ka National Sports Day
