Mawkyrwat, Nailar 31
Ka Khasi Students Union (KSU) South West Khasi Hills District ha ka 30 tarik u Nailar 2025 ka la pynlong ïa ka jingïaid paidbah kaba kyndit bad leit tur ruh sha ka ophis jong u Syiem ka Hima Maharam kaba don ha Mawkyrwat ban dawa ïa u Syiem ba u dei ban khot noh mardor ïa ka Dorbar Hima bad ban pyndam noh ïa ka jingthmu ban ai ha ki BSF ïa ka jaka jong ka Hima kaba don hajan ka Wah Mula, Ranikor Civil Sub-Division kaba ju pyndonkam da ki khun ki hajar ban rep ban riang mynta la bun phew snem.
Hadien kiwei pat ki kynhun sengbhalang kiba kynthup ïa ka FKJGP, HITO, HYC, HNYF bad ka HANM ki la ïasnohkti lang ha ka jingïakhih.
Kumba lai kynta tam eiei u Syiem ka Hima Maharam, u Paiem Niandro Syiemiong um shym la mih satia na ophis jong u katba kitei ki sengbhalang ki dang pyrta pyrshah ïa u bad ïa ka Executive Dorbar ka Hima Maharam. Hadien kata na ka liang u Syiem u la khot ïakren ïa ki katto katne ngut ki nongïalam hapoh ophis jong u.
Haba kren sha ki nongthoh khubor hadien ka jingïakynduh ïa u Syiem, u President ka KSU South West Khasi Hills District, u samla Forwardman Nongrem u la ong ba na ka liang ka seng ryngkat bad kiwei ki sengbhalang ki la kren da kaba shai ïa u Syiem ba kin aipor haduh ka sngi Nyngkong jong ka taïew ban wan ba un lum ïa ka Dorbar kyrpang bad ban pynbna ba ka Hima ka la weng noh ïa katei ka jingthmu ban ai ïa ka jaka rep jong ki Khasi ha ki shipai.
U la maham tyngeh ba lada u Syiem um lah ban leh ïa kata, ka seng ryngkat kiwei pat ki sengbhalang kin leh da kaba tyngeh.
Haba kylli la ki sengbhalang kin pyrshah ne em ban ai jaka ha kiwei pat ki jaka, u samla Forwardman u la ong, ba lada u Syiem bad ka Executive Dorbar ki ai ïa kino kino ki jaka, kiba rep ba riang bad kiba ktah ïa ki khun ki hajar, ka KSU da lei lei kan ym ailad.
