Shillong, Nailar 31
Uwei u samla u ba la tip kyrteng u Jonathan Rynjah ba la 26 snem ka rta, na shnong Mawïong Tariang u la khlad noh ha kawei ka paiñkhana kaba don ha ka jaka ïeng Rel ha Kerala.
Ka jingkhlad noh jong utei u samla ka dei hadien ba la lap da ki bor pulit ka Kerala ba u la thiah ïap ha katei ka paiñkhana kaba don ha ka jaka ïeng Rel ha ka sngi Thohdieng, ka 29 tarik u Nailar 2025.
Haba ïoh pat ban ïakren bad u Kpa jong utei u samla u Bah Kordor Shabong uba don mynta ha Kerala u la ïathuh ba haduh mynta ka met jong u Jonathan ka dangdon ha Kerala bad kin sa wanrah noh lashai ka sngi Nyngkong, ynda la pyndep lut ïa ki kot ki sla kiba donkam baroh.
U la ïathuh ba ïa ka met jong u Jonathan, ki bor pulit ki la dep leh ïa ka post mortem, da kaba ïathuh ruh ba ha ka khaiphod la ong ba ka jingkhlad noh jong u Jonathan ka dei ba u set mynsiem u sa khlad noh ha katei ka paiñkhana.
U Bah Kordor Shabong u ong, “Ngam tip la u set mynsiem ba u shitom ne dei ha kano ka bynta hynrei ngin hap shu hun la ka hun noh namar ba u briew u la khlad bad tang U Blei hi u ba tip ïa kine ki jingjia baroh”.
Haba kylli, u Bah Kordor u la ong ba um don kano kano ka jingsuba sniew namar ba um ïohi ïa ka jingjia, la u set mynsiem ne ha kano ka rukom ba u sa khlad.
U la ïathuh ruh ba ka met jong u Jonathan ka la jngem lut baroh bad ki khmat ruh ki shu peit haduh mynta bad haba pyrshang ban tap noh hynrei kim lah tap shuh.
Shuh shuh u la ïathuh ba ka mobile phone bad ka pisa jong u ruh la shah tuh lut hynrei la ïoh sa tang ki jaiñ phong ba u rah na ïing bad ka Bible ba u thep hapoh ka pla. Mynta ki dangdon ha Kerala bad kin sa wan phai lashai ka sngi hadien ba la dep leh lut ïa ki kot ki sla, u la bynrap.
Haba ïadei pat bad ka jingkhlad, u Bah Kordor u la ong ba u Jonathan u la ïap lyngkhuid khlem ki jaiñ phong ha kamet bad u la raikhoh bha bad ki pulit ruh ha kapor ba ki lap ïa kamet ïap u Jonathan ki la shu kynjat ïa ka jingkhang katei ka paiñkhana namar ba ka la khang.
“Nga la ïoh ban ïakren khatduh bad u khun ha ka 27 tarik u Nailar 2025 ha kapor ba u dangmih na Guwahati ban leit sha Kerala, ha kaba u la phone ïanga ban pan pisa namar ba u la shah tuh. Hadien kata u la pyrshang biang ban phone hynrei um ïoh shuh naduh kata hi ka sngi bad ka phone jong u ruh ka switoff beit bad hadien kata la ïoh jingtip pat ba u khun jong u, u la khlad noh” la bynrap u Bah Kordor.
